t Evengelie volgens Matteüs Over t vergeven (18:15-35)

t Evengelie volgens Matteüs 18

¹⁵ As dien bruier verkeerd dut, geef hom onder vaaier ogen n inzeggen. As e lustert, hest dien bruier weer aan dien kaant.
¹⁶ Wil e nait noar die lustern, hoal der den nog ain of twij aandern bie. Deur twij of drij heur getugenis ligt verkloaren ja vaast.
¹⁷ As e ook noar heur nait lustern wil, leg t gevaal den aan gemainte veur. As e doar ook nog nait noar lustern wil, den most hom as n haaiden en tolboas behandeln.
¹⁸ Ik verzeker joe: dat wat ie hier op eerde vastleggen, geldt ook in hemel. En wat ie hier op eerde nait bindend verkloaren dat zel ook in hemel nait binden.
¹⁹ Ook dit zeg ik joe nog: as twij van joe hier op wereld ainpoareg wat vroagen den zellen ze t van mien Voader in hemel kriegen.
²⁰ Want doar twij of drij bie nkander binnen in mien noam doar bin ikzulm bie heur.”

²¹ Petrus kwam hom vroagen: “Heer, hou voak mout ik mien bruier vergeven as e mie ieder bòt vannijs onrecht aandut? Zeuven keer meschain?”
²² “Gain zeuven keer,” antwoordde Jezus, “nee, seuventeg moal zeuven keer!
²³ Doarom kin ie t hemels keunenkriek vergelieken mit n keunenk dij mit zien knechten ofreken wol.
²⁴ Hai was nog mor net begund, of der wer ain veur hom brocht dij hom tiendoezend talenten schuldeg was.
²⁵ Hai kon nait betoalen. Van dij gevolgen, dat keunenk odder gaf hom te verkopen, mit vraauw en kinder en aal wat of e haar derbie. Zo kon schuld liekmoakt worden.
²⁶ Knecht vuil op knijen: 'Kiek t nog even aan, Heer!' zee e, 'en ik zel joe ales betoalen.'
²⁷ Boas haar mit knecht te doun: hai luit hom lopen en schuld luit e mor zitten.
²⁸ Dou dij knecht votging, trof e n mitaarbaider dij hom honderd zulverstokken betoalen mos. Hai greep hom bie ströt en zee: 'Betoal mie wat ik van die hebben mout!'
²⁹ Dij mitaarbaider vuil veur hom op knijen: 'Kiek t nog even aan! Ik zel die ales betoalen!'
³⁰ Hai wol der niks van waiten, mor luit aander alderdeegs in t gevang smieten, net zo laank tot e schuld ofbetoald haar.
³¹ Dou zien kammeroaden dat altmoal zagen, wazzen ze der min over te spreken en vertelden aan boas aal wat of ter gebeurd was.
³² Dou luit boas man bie zok kommen. 'Doe minne kerel!' zee e. 'Haile schuld heb ik die kwietscholden doustoe mie der om vruigst.
³³ Haarstoe den ook gain meedlie hebben mouten mit dien mitaarbaider, zo as ik meedlie had heb mit die?'
³⁴ Boas wer zo glìn in hakken, dat hai stuurde hom noar folterkoamer. Doar zol e blieven, net zo laank totdat e haile schuld liekmoakt hebben zol.
³⁵ Krekt zo zel mien hemelse Voader mit joe doun as elk van joe zien bruier nait van haarten geern vergeft!”