1 Samuël Siklag platbraand (30: 1-16)

1 Samuël 30

⁰¹Dou David en zien manlu op daarde dag bie Siklag kwammen, haren Amalekieten in de Negev n rooftocht holden en Siklag overvalen. Ze haren stad innomen en platbraand.
⁰²Vraauwlu dij doar touhuilen, jonk en old, haren ze mitnomen. Zunder dat ze ook mor ain doodmuiken, dreven ze heur vot en gingen wieder.
⁰³Bie Siklag aankommen, zagen David en zien mannen dat stad platbraand was en dat heur vraauwen, zeuns en dochters mitnomen wazzen.
⁰⁴Dou schraifden David en t volk dat bie hom was, tot ze nait meer schraiven konden.
⁰⁵David zien baaide vraauwen wazzen ook vot: Achinoäm oet Jizreël en Abigaïl, dij traauwd west haar mit Nabal oet Karmel.
⁰⁶David ruik doaneg in t naauw, want t volk haar t ter over dat ze hom mit stainen doodsmieten zollen. Aal t volk was ja verbidderd om t verlus van heur zeuns en dochters. Mor David von kracht bie de HEER, zien God.
⁰⁷Hai zee tegen priester Abjatar, zeun van Achimelech: “Breng mie t priesterklaid.” Abjatar brochde hom dij.
⁰⁸“Mout ik achter dizze bende aan?” vruig David aan de HEER. “Kin k heur inhoalen?” “Joa, goa ze mor achternoa. Ie zellen heur wizzenzeker inhoalen en bevrijden,” zee de HEER tegen hom.

⁰⁹David ging op pad mit de zèshonderd man dij bie hom wazzen. Ze kwammen bie beek Besor.
¹⁰ David ging mit vaaierhonderd man wieder. Aandern bleven doar, want twijhonderd man wazzen te muid om beek Besor nog over te goan.
¹¹ Op t veld vonden ze n Egyptenoar. Ze brochten hom bie David. Ze gavven hom brood en hai at en ze luiten hom wotter drinken.
¹² Ze gavven hom n plak van n klomp viegen en twij rezienekouken. Dou e dat op haar, kwam e weer op verhoal, want hai haar in drij doagen en nachten gain etendrinken had.
¹³ “Bie wèl heur ie? Woar kom ie vandoan?” vruig David. “k Bin n Egyptenoar,” zee e, “n sloaf van n Amalekiet. Mien meester het mie hier liggen loaten, want drij doagen leden bin k zaik worden.
¹⁴ Wie haren n invaal doan in de Negev en hebben t laand van Keretieten, Judeeërs en Kalebieten overvalen. Siklag heb wie platbraand.”
¹⁵ “Zol ie mie bie dizze bende brengen kinnen?” vruig David. “Joa,” zee e. “As ie mie bie God sweren dat ie mie nait doodmoaken en mie nait aan mien meester overlevern zellen, den zel k joe noar dat roversvolk tou brengen.”

¹⁶ Hai brochde hom der hèn. Ze laggen verspraaid over t haile laand en atten en dronken en haren feest, omdat ze zok zo veul touaigend haren oet t laand van Filistijnen en oet t laand van Juda.