Rechters 6:33-40

³³ Weer kwammen Midjan, Amalek en aander stammen oet t oosten bie nkander. Ze stoken revier over en zetten heur tènten op in vlakte van Jizreël.
³⁴ Dou kwam gaist van de HEER over Gideon. Hai bluis op ramshoorn om ale volk van Abiëzer op te roupen.
³⁵ Ook stuurde hai bosschoppers deur hail Manasse om dij lu bie nkander te hoalen. Boetendes stuurde hai nog gounent deur Aser, Zebulon en Naftali. Dij sloten zok ook bie hom aan.
³⁶ Dou vruig Gideon aan God: “Wil ie echtwoar Israël deur mie vrij moaken, zo as ie zegd hebben?
³⁷ Kiek ais, k heb hier n plok schoapewol. Dat leg ik op dörsdeel hèn. As ter mörgenvroug allenneg daauw op wol ligt, mor haile grond der omtou is dreug, den wait ik zeker dat ie deur mie Israël vrij moaken zellen, zo as ie zegd hebben.”
³⁸ En zo gebeurde t ook. Aanderdoagsmörgens was e der vroug bie. Hai kon wol wel oetvringen van ale daauw, altmoal wotter, wel n koem vol.
³⁹ Dou zee Gideon tegen God: “Ie mouten mor nait lèlk op mie worden as k joe nog wat vroag. Ik zol t geern veur leste moal nog ais perbaaiern willen mit dij wol. As wol nou ais dreug bleef en op ale grond der omtou kwam nou daauw te liggen.”
⁴⁰ Dij naacht dee God dat. Allenneg wol was dreug, ale grond der omtou was nat van daauw.