Jesaja 45:14-19

¹⁴ Zo zegt de HEER:
Bezit van Egypte

en handel van Nubië,

manlu van Seba, groot van pestuur,

oversteken zellen ze noar joe en van joe wezen.

Zai zellen joe achternoakommen, vaast in boeien volgen;

zai zellen zok veur joe deelboegen, veur joe belieden:

“God is mit joe, n aander is ter nait,

der is gain aander god.

¹⁵ Zekerwoar, ie binnen n God dij zok bezied holdt,
ie, God van Israël, dij redt.”

¹⁶ Rood om kop van schoamte mouten ze worden,
dij moakers van beelden,

altmoal verswinnen van schimp en schaande.

¹⁷ Israël wordt red deur de HEER,
zien haail het gain èn of swet.

Ie huiven nait rood worden van schoamte,

ale tieden deur nait.

¹⁸ Zo zegt de HEER,
dij hemels schoapen het –

hai, dij eerlieks God is –

dij eerde vörmd het en moakt,

zien fonnementen legd,

– nait schoapen om leeg te blieven,

mor vörmd om op te wonen:

Ik bin de HEER en gainain aans.

¹⁹ Nait in t bezied, heb ik joe sproken,
nait oet n duuster stee vandoan,

ik zee nait tegen Jakobs noageslacht:

“Zuik mie in de wareboudel.”

Ik, de HEER, ik moak joe t haail bekend,

ik verkundeg wat rechtveerdeg is.