Psaalm 47

⁰⁰¹Veur meziekmeester. Van Korachieten, n psaalm.

⁰⁰²Klap in handen, volken,
jubel veur God mit t hoogste laid,

⁰⁰³want geducht is de HEER, de Alderhoogste,
machtege keunenk van haile eerde.

⁰⁰⁴Volken jagt hai veur ons oet,
noatsies legt hai aan ons vouten.

⁰⁰⁵Hai kust t aarfdail veur ons oet,
doar Jakob, dij hai geern lieden mag, slim grootsk op is. qs selaqs*

⁰⁰⁶Onder joechaaien is God opstegen,
de HEER steeg op bie t geluud van bezunen.

⁰⁰⁷Zing veur God mit meziek, zing veur hom,
zing mit meziek veur ons keunenk, zing veur hom.

⁰⁰⁸God is ja keunenk van haile eerde,
zing n kunsteg laid.

⁰⁰⁹God is keunenk over volken,
God zit op zien haailege troon.

⁰¹⁰ Vernoamsten van volken hebben zok aansloten
bie t volk van God van Abraham:

want schilden van eerde binnen van God.

Hai is hoog verheven.