Eerste braif van Petrus 2 : 18-25

¹⁸ Knechten en maaiden in hoes: hol joen boas in eren en wait joen stee. Nait allenneg as ze goud en vrundelk binnen, mor ook as t n minne is.
¹⁹ As ain, omdat e reken holdt mit God, onrecht verduren mout dat e nait verdaind het, den is dat t wat God geern zugt.
²⁰ Verkeerd doun en den sloag kriegen, is niks biezunders. Mor heb ie gouddoan en toch sloag kregen, den dail ie in Gods gunst.
²¹ Lieden, doar bin ie veur bestemd. Christus zulm het ja veur joe leden. Hai het joe doar n veurbeeld mit geven. Goa doarom wieder in zien spoor.
²² Zunden het e nooit doan, aan bedrog het e zok nooit schuldeg moakt.
²³ As e oetscholden wer, dee e niks weerom. As e lieden mos, kwam e nait mit draaigementen. Nee, hai gaf t over aan hom dij rechtveerdeg oordailt.
²⁴ Hai het ons zunden op zok nomen in aigen persoon, aan t kruus. Zo wol e ons vrijmoaken van zunden en zo mag we leven in gerechteghaid. Deur zien striemen bin we beter worden.
²⁵ Eertieds was ie net schoapen, haildaal t pad biester. Nou bin ie weeromkommen bie hedder dij touzicht holdt op joen levent.