Eerste braif van Petrus 2 : 11-17

¹¹ Laive bruiers en zusters! Ie binnen hier vremden, ie wonen hier mor tiedelk. Doarom drok ik joe op t haart: geef nait tou aan joen zundege begeertes. Dij hebben t veurzain op joen woare levent.
¹² Middenmaank haaidense mensken mout ie joe goud aanstellen. Ze maggen joe den al veur misdoadegers oetmoaken, as ze joen goie doaden zain, zellen ze reden hebben om God te eren en te priezen op dag dat e noar joe komt te kieken.
¹³ Ie mouten nek boegen veur wat mensken (joe) bestellen – om de Heer zien wil. t Mag kaaizer wezen – hai het t ja te zeggen as hoogste boas,
¹⁴ of zien stadholders – baaident binnen ja deur hom aansteld om lu dij t kwoaie doun te stravven en heur dij t goie doun te priezen.
¹⁵ God wil ja dat ie deur joen goud gedrag onverstandege lu heur domme proat tou swiegen brengen.
¹⁶ Leef as vrije mensken. Woar joe der veur dij vrijhaid te bruken om goud te proaten wat ie verkeerd doan hebben. Mít dij vrijhaid mout ie God dainen.
¹⁷ Geef elk eer dij hom toukomt. Hol van joen bruiers en zusters. Vrees God en eer kaaizer.