Wieshaid van Jezus Sirach Gezondhaid (38:1-15)

Wieshaid van Jezus Sirach 38

⁰¹Hol dokter in eren, want kinst verlet om hom kriegen,
hai is ook deur de Heer schoapen,

⁰²en aalhouwel beterschop van Alderhoogste komt,
wordt hai deur keunenk beloond.

⁰³n Dokter wordt eerd om zien kunde,
hai wordt deur notoabeln bewonderd.

⁰⁴Deur de Heer levert eerde kruderijen op dij betermoaken,
n verstandeg mensk wist ze nait òf.

⁰⁵Wer t wotter nait zuit deur n stok holt,
zodat zien kracht bekend wer?

⁰⁶De Heer zulm dee mensken kennes,
zodat e om zien wonderboarlieke kruderijen prezen wer.

⁰⁷Doar moakt hai mit beter en nemt e pien mit weg,

⁰⁸aptaiker moakt ter baalzem van.
De Heer zien waark komt gain èn aan,

hai brengt beterschop op eerde.

⁰⁹Kind, negeer dien zaikte nait,
mor beed aan de Heer, den zel hai die beter moaken.

¹⁰ Begoa gain misstappen, wees rechtschoapen,
zuver die van elke zunde.

¹¹ Breng n lekker roekend ovver, geef n haandvol waaitenmeel,
breng n rieke goave, ofstoe al op staarven ligt.

¹² Roup dokter ook, want hai is ook schoapen deur de Heer,
hol hom nait op n ofstandje, hai is ook neudeg.

¹³ Goie ofloop ligt sums in zien handen;

¹⁴ zulm beedt e ook aan de Heer,
dat hai hom weg noar beterschop aanwist

en t levent redt.

¹⁵ Dij zundegd het tegen zien moaker,
mout mor in doktershanden valen.