Numeri Geloftes van vraauwlu (30:2-17 )

Numeri 30

⁰²Mozes zee tegen stamoldsten van Isrelieten: “Dit is t woord dat de HEER sproken het:
⁰³As n man de HEER n gelofte dut of n aid dut op n verplichten dij e aangaait, mag hai zien woord nait breken, mor mout hai ales doun wat e zee.

⁰⁴Mor as n vraauw n gelofte dut of n verplichten op heur nemt as ze nog as jonk wicht thoes woont
⁰⁵en heur voader kreeg t wel te heuren welke gelofte of verplichten zai zok oplegd het, mor hai dut t swiegen der tou, den blieven aal heur geloftes en verplichtens van kracht.
⁰⁶Mor as heur voader heur integen komt as e t te heuren krigt, is gainain van geloftes of verplichtens dij ze zok oplegd het van kracht, en de HEER zel heur t vergeven omdat heur voader heur weerstoan het.

⁰⁷As ze in tied traauwd is en heur geloftes of ondeurdochte belofte dij ze zok oplegd het, rusten nog op heur,
⁰⁸en heur man krigt t wel te heuren, mor hai dut t swiegen der tou, den blieven heur geloftes van kracht en heur verplichtens dij ze op zok nomen het, blieven ook van kracht.
⁰⁹Mor as heur man heur integen kommen is dou e t te heuren kreeg, den het hai gelofte dij op heur rust, of ondeurdochte belofte dij ze zok oplegd het, ongeldeg moakt en de HEER zel heur t vergeven.

¹⁰ Wat gelofte van n wedevraauw of van n verstötte vraauw aangaait: ale verplichtens dij zai zok opleggen, blieven van kracht.

¹¹ As n traauwde vraauw n gelofte doan het of n aid dut op n verplichten
¹² en heur man krigt t te heuren, mor hai komt heur nait integen, den blieven aal heur geloftes van kracht en elke verplichten dij ze zok oplegd het, blift van kracht.
¹³ Mor as heur man zoks noadrokkelk ongeldeg moakt op dag dat hai t te heuren krigt, den is gainain van heur touzeggens van kracht, zowel geloftes nait as ook verplichtens nait. Heur man het ze ongeldeg moakt, en de HEER zel heur t vergeven.
¹⁴ Elke gelofte en elke verplichten tot vasten, kin heur man bekrachtegen of ongeldeg moaken.
¹⁵ Mor as heur man n dag en n naacht laank noadrokkelk tegen heur swigt, den bekrachtegt hai aal heur geloftes en ale verplichtens dij op heur rusten; hai bekrachtegt ze omdat e tegen heur swegen het dou e t te heuren kreeg.
¹⁶ Mor moakt hai ze noadrokkelk ongeldeg noadat e t heurd het, den dragt hai verantwoorden.”

¹⁷ Dit binnen inzettens dij de HEER Mozes opdruig wat betreft man en vraauw, voader en n jonge dochter as dij nog bie hom in hoes woont.