2 Samuël Gods touzeggens over Doaved zien noageslacht (7: 1-17)

2 Samuël 07

⁰¹2 Dou David goud en wel in zien pelaais woonde, en dou de HEER zörgd haar dat aal zien vijanden rondom hom mit vree luiten, zee David tegen profeet Natan: “Nou mos toch ais kieken, ík woon hier in n pelaais van cederholt, en aark van God staait in n hail gewone tènt.”
⁰³Natan zee: “Dou ales mor gerust zo as joen haart joe ingeft. De HEER is ja mit joe.”
⁰⁴Mor aigenste naacht zee de HEER tegen Natan:
⁰⁵“Zeg tegen mien knecht David oet mien noam: 'Doe bist t nait dij mie n hoes baauwen zel doar ik in wonen kin.
⁰⁶Van tied òf aan dat ik Isrelieten oet Egypte hoald heb tot vandoag aan tou heb ik ja nooit in n hoes woond. Aal dij tied heb ik rondraaisd en in n tènt woond.
⁰⁷En bie aal mien omswinnen in Israël, heb ik dou ooit n moal tegen laaiders zegd dij ik aansteld haar om mien volk te laaiden as n hedder zien schoapen: Baauw toch ais n hoes van cederholt veur mie?'
⁰⁸Dat, Natan, zeg dit oet mien noam tegen mien knecht David: 'Zo zegt d'Aalmachtege HEER: Ik heb die van t laand achter schoapen vothoald om laaider van mien volk Israël te wezen.
⁰⁹Ik heb die altied overaal bie hulpen. Ale vijanden dij die in weeg stonden, heb ik oetreud. Ik heb die net zo'n grode noam geven as grootsten op eerde.
¹⁰-11 Ik heb mien volk Israël n stee geven doar ze mit vree leven kinnen. Ze worden nait meer opjagd en deur bandieten onder doem holden zo as vrouger, in tied dat ik rechters over heur aanstelde. Ik heb zörgd dat aal dien vijanden die mit vree loaten. En nou kundeg ik aan dat ik, de HEER, veur die n hoes baauwen zel.
¹² Astoe oet tied kommen bist en bie dien veurvoaders bist, zel ik zörgen dat ter n noazoat van die, ain van dien aigen kinder, op dien troon komt.
¹³ Díj zel veur mie n hoes baauwen. En ik zörg der veur dat zien troon nooit wankeln zel.
¹⁴ Ik zel n voader veur hom wezen, en hai veur mie n zeun. As hai verkeerd dut, zel ik hom sloag geven zo as n voader zien zeun,
¹⁵ mor nooit zel ik hom lösloaten, zo as Saul dij ik aan zied schoven heb om die in zien stee keunenk te moaken.
¹⁶ Mor dien hoes zel altied bestoan en dien keunenkschop zel altied duren, dien troon blift aiweg en altied in t èn.'”

¹⁷ Natan vertelde dit altmoal persies zo as de HEER hom in n vizioun zegd haar.