2 Samuël Doaved zien overwinnens rondom heer (8: 1-14)

2 Samuël 08

⁰¹Doarnoa versluig David Filistijnen. Hai vernederde heur en nam heur t bestuur over heur laand oet handen.
⁰²Moäbieten versluig hai ook. Soldoaten dij overwonnen wazzen, mozzen op grond liggen goan. Dou legde hai der n moatbaand bie langs. Twij moatlengtes werden ze doodmoakt, en den ain lengte, roem bemeten, in t levent loaten – en zo keer op keer. Moäbieten werden zien knechten en mozzen hom belasten betoalen.
⁰³David versluig ook Hadadezer, zeun van Rechob en keunenk van Soba. Dij was op pad goan om aan Eufraat tou t hecht weer in handen te kriegen.
⁰⁴David nam zeuventienhonderd man van zien peervolk gevangen en twinnegdoezend van t voutvolk. Ale peerden van striedwoagens op honderd noa, luit e hakzenen deursnieden.
⁰⁵Arameeërs van Damascus dij n leger stuurd haren om Hadadezer te helpen, werden ook versloagen deur David: twijentwinnegdoezend man.
⁰⁶Hai zette wachtposten in heur kontraain. Arameeërs mozzen hom belasten betoalen en werden zien knechten. Netgliek woar hai op ofging, altied gaf de HEER hom d'overwinnen.

⁰⁷David nam golden schilden van Hadadezer zien liefwacht mit noar Jeruzalem.
⁰⁸Hai het ook oet Betach en Berotai, twij steden van Hadadezer, n hail bult koper mitnomen.
⁰⁹Toï, keunenk van Hamat, heurde dat David t haile leger van Hadadezer versloagen haar.
¹⁰ Hai haar hailtied al drokte had mit Hadadezer, en doarom stuurde hai zien zeun Joram noar David tou mit zien kompelmenten en hai wènste hom gelok mit zien overwinnen. Joram haar ook verschaaiden kedoos van zulver, gold en koper bie zok.
¹¹ Keunenk David legde dij geschenken aan zied veur de HEER. Dat haar hai ook al doan mit t zulver en gold, dat hai in handen kregen haar van aal dij aander overwonnen volken:
¹² Edomieten, Moäbieten, Ammonieten, Filistijnen, Amalekieten; en van Hadadezer, keunenk van Soba en zeun van Rechob.

¹³ Zo kwam David alerwegens meer in aanzain. Dou hai weeromkwam noadat hai Arameeërs versloagen haar, overwon hai ook Edomieten nog in t Zoltdaal, achtiendoezend man.
¹⁴ Hai zette wachtposten in t haile laand Edom en Edomieten werden zien knechten. Woar hai ook op ofging, altied gaf de HEER hom d'overwinnen.