2 Samuël Doaved zörgt veur Jonatan zien zeun Mefiboset (9: 1-13)

2 Samuël 09

⁰¹David vruig ais: “Is ter nog ain over van Saul zien femilie? Den wil ik dij goud behandeln. Dat bin ik aan Jonatan verplicht.”
⁰²Nou was ter bie Sauls femilie ain in dainst, dij Siba haitte. David luit hom ophoalen en vruig: “Bistoe Siba?” “Joa, mien heer en keunenk,” zee e, “dat bin k.”
⁰³Keunenk vruig hom: “Is ter nog ain van Saul zien femilie? Den wil ik dij goud behandeln. Dat heb ik God beloofd.” “Joa, mien heer en keunenk,” zee Siba, “der is nog n zeun van Jonatan. Hai is aan baaide bainen kreupel.”
⁰⁴“Woar holdt dij tou?” vruig keunenk. “In hoes bie Machir, Ammiël zien zeun, in Lo-Debar,” zee Siba.

⁰⁵Keunenk David luit hom ophoalen oet Lo-Debar.
⁰⁶Dou Mefiboset, de zeun van Jonatan en klaainzeun van Saul, bie David kwam, boog hai daip veur David. “Mefiboset?” vruig David. “Joa, mien heer en keunenk, joen dainstknecht,” zee hai.
⁰⁷“Wees mor nait baang,” zee keunenk. “Ik wil die ja goud behandeln. Dat bin ik aan dien voader Jonatan verplicht. Ik zel zörgen dastoe aal t laand van dien grootvoader Saul weer krigst. En doe zelst altied as gast bie mie aan toavel zitten.”
⁰⁸Mefiboset boog weer daip en zee: “Mien heer en keunenk, ik bin nait weerd dat ie omdenken mit mie hebben. Ik bin ja niks meer as n dooie hond.”

⁰⁹Keunenk luit Siba kommen, Saul zien hoesknecht, en zee: “Siba, ales wat van Saul en zien femilie west het, geef ik aan Mefiboset, klaainzeun van dien vrougere meester.
¹⁰ Doe most mit dien zeuns en knechten (Siba haar vieftien zeuns en twinneg knechten) zien laand bewaarken en opbrengst inhoalen, zodat haile femilie van dien meester der van leven kin. Mor Mefiboset zulm zel geregeld as gast bie mie aan toavel miteten.”
¹¹ “Mien heer en keunenk,” zee Siba, “ik zel joen odders stipt oetvoeren.” Zodounde zat Mefiboset geregeld bie David aan toavel, net as ain van keunenk zien aigen zeuns.
¹² Mefiboset haar nog n zeun, n luk jonkje. Micha haitte dij. Siba en zien haile hoesholden werden knechten van Mefiboset.
¹³ Zo is dij kreupele Mefiboset in Jeruzalem beland en hai het hailtied as gast aan toavel bie David touholden.