Jesaja Bodes oet Boabel (39: 1- 8)

Jesaja 39

⁰¹In dij tied stuurde Merodach-Baladan, zeun van Baladan en keunenk van Babylonië, bodes noar Hizkia mit n braif en mit kedoos. Hai haar ja heurd van zien zaikte en beterschop.
⁰²Hizkia was ter haile blied mit en hai luit heur zien schathoes zain, zien zulver en gold, de kruderijen en kostboare eulie, zien woapenhoes en ales wat in zien opslagkoamers te vinden was. Der was niks of naks in zien pelaais of in zien haile riek, dat Hizkia heur nait zain luit.
⁰³Profeet Jesaja ging noar Hizkia tou. Hai vruig: “Wat bosschop haren dij lu? Woar kwammen ze heer?” “Ze kwammen van wied vot,” antwoordde Hizkia. “Oet Babylonië!”
⁰⁴Jesaja vruig: “Wat hebben ze aalmoal zain in joen pelaais?” “Ales wat ter is,” zee Hizkia, “hebben ze zain. Der is niks in mien opslagkoamers, dat ik heur nait zain loaten heb.”
⁰⁵Dou zee Jesaja tegen Hizkia: “Luster noar t woord van de HEER van de machten:
⁰⁶Der komt n tied, dat ales wat ter in joen pelaais te vinden is, ales wat joen veurolden tot vandoag aan dag tou opbultjed hebben, noar Babel overbrocht worden zel. Der blift niks van over – zegt de HEER.
⁰⁷En gounent van joen zeuns, joen bloudaigen noazoaten, zellen ze mitnemen. Ze zellen dainstdoun in keunenk van Babylonië zien pelaais.”
⁰⁸Hizkia zee tegen Jesaja: “t Woord van de HEER dat ie sproken hebben, is goud.” Want Hizkia dochde bie zokzulm: In mien tied zellen vree en vaaileghaid nog wel aanholden.