Exodus Regels over n aander zien bezittens (22: 1-20)

Exodus 22

⁰¹As n daif bie naacht trappaaierd wordt bie t inbreken en den doodhaauwen wordt, den mag dat nait as moord aanrekend worden.
⁰²Mor as zukswat bie kloarlichten dag gebeurt, den geldt dat aal as moord. n Daif mout ales vergouden wat e stolen het; as e niks het, mout hai zulm as sloaf verkocht worden omdat e stolen het.
⁰³As wat e stolen het nog leventeg bie hom vonden wordt, of t nou n os is of n ezel of n schoap, den mout hai dat dubbeld vergouden.

⁰⁴As ain zien vij op zien aigen laand of droevetoen waaiden let en der gain acht op geft dat zien vij ook van n aander zien laand vret, den mout hai dij schoa vergouden. Hai mout de beste vruchten van zien laand en van zien droevetoen aan dij aander as vergouden geven.

⁰⁵As aine aan t vuurtjebranden is, en hoageldoorn komt ter bie in brand en koornbulten verbranden, of koorn dat op worrel staait of t haile gewas, den mout dij t aanstoken het, schoa haildaal vergouden.

⁰⁶As ain geld en goud aan zien noaber geft om der op te pazen en t wordt noaber tou zien hoes oet stolen, den mout daif, as e pakt wordt, schoa dubbeld vergouden.
⁰⁷As daif nait pakt wordt, den mout dij noaber veur God n aid doun dat e buurman zien goud nait zulm stolen het.
⁰⁸As ain n os, n ezel of n schoap, n stok goud of aans wat het doarvan n aander, dij wat kwiet is, zegt: 'Dat is mienent,' den mouten zai mit heur baaident dij kwezzie veur God brengen. Dij deur God as schuldege aanwezen wordt, mout d'aander n dubbelde vergouden geven.

⁰⁹As ain aan zien noaber n os, n ezel of n schoap of n aander baist geft om der op te pazen, den kin dat daaier doodgoan, n poot breken, stolen worden of zukswat, zunder dat ain t zugt.
¹⁰ Den mout n aid veur God onder heur baaident oetmoaken of dij oppazen mos, gain schuld aan dij schoa het. Aigender mout zok doarbie deelleggen en noaber huift niks te vergouden.
¹¹ As t daaier hom ofstolen is, mout hai aan aigender schoa vergouden.
¹² As t deur n wild daaier verscheurd is, mout hai dat dode baist as bewies zain loaten. Den huift hai schoa nait te vergouden.
¹³ As ain van zien noaber n daaier laint en doar gebeurt wat mit of t gaait dood, doar d'aigender nait bie is, den mout hai de volle schoa vergouden.
¹⁴ Mor as aigender der aal bie was, huift hai niks te vergouden. En as t daaier huurd was, is schoa bie pries inbegrepen.

¹⁵ As ain n wichtje dat nog nait verloofd is, verlaaidt en bie heur slept, mout hai mit heur traauwen en aan heur voader de volle pries veur heur betoalen.
¹⁶ As heur voader nait lieden wil, dat hai mit heur traauwt, den mout hai toch de volle pries veur heur betoalen.

¹⁷ n Teuverheks mag ie nait in leven loaten.

¹⁸ Elk dij geslachtelke omgang het mit n daaier, mout doodmoakt worden.

¹⁹ Wèl noast God ook nog aan aander goden ovvert, mout tou gemainschop oetstöt worden.

²⁰ Vremden mag ie nait min behandeln, of heur t levent swoar moaken. Ie hebben zulm ja vremden in Egypte west.