Ezechiël 15

⁰¹Ik kreeg dit woord van de HEER:
⁰²“Manmensk, wat is ter toch zo biezunder aan t holt van wiendroef? Is t meer van nut as dat van aander bomen?
⁰³Is ter wat bruukboars van te moaken? Kinstoe der meschain n hoak van moaken om der wat aan op te hangen?
⁰⁴t Wordt as branholt in t vuur smeten, baaide oetènnen binnen verkoold, t middelstok swaartbloakerd – deugt t den nog woaraarns veur?
⁰⁵Zugst wel, as t nog geef is, kinstoe der niks van moaken, des te minder hest ter den nog aan as t in t vuur verkoold en swaartbloakerd is!
⁰⁶Dit zegt God, de HEER: t Holt van wiendroef is nait beter as dat van aander bomen. t Komt in t vuur te laande, en krekt zo zel t inwoners van Jeruzalem ook vergoan.
⁰⁷Ik zel mie tegen heur keren: al binnen ze t vuur ook ontsprongen, toch zel vuur heur verteren. En den, as ik mie tegen heur keer, zel ie besevven dat ik de HEER bin.
⁰⁸Ik zel van t laand n wildernis moaken omreden ze binnen mie ontraauw worden – dat zegt God, de HEER.”