1 Samuël 16 : 1-13

⁰¹De HEER zee tegen Samuël: “Hou laank zel ie nog verdrait hebben over Saul? Ik heb hom ja as keunenk over Israël aan zied schoven. Vul joen hoorn mit eulie en goa aan raais. Ik stuur joe noar Isaï in Betlehem. Ain van zien zeuns heb ik mie as keunenk oetzöcht.”
⁰²“Hou zol ik doar hèngoan kinnen?” vruig Samuël. “As Saul der van heurt, zel e mie doodmoaken.” “Ie mouten n jonge kou mitnemen,” zee de HEER, “en zeg: ‘Ik bin kommen om veur de HEER n ovver te brengen.’
⁰³Ie mouten Isaï tou dit ovver nuigen. Ik zel joe beschaaid geven wat of ie doun mouten. Ie zellen veur mie zaalven dij ik joe wiezen zel.”
⁰⁴Samuël dee wat of de HEER zegd haar. Hai kwam in Betlehem. Oldsten van stad kwammen hom trillend van benaauwdens in muit en vruigen: “Kom ie in vree?”
⁰⁵“Joa,” zee Samuël. “Ik bin kommen om de HEER n ovver te brengen. Haaileg joe en kom mit mie om te ovvern.” Hai haailegde Isaï en zien zeuns en nuigde heur om aan t ovver mit te doun.
⁰⁶Dou ze kwammen en hai Eliab zag, dochde hai: “Wis, veur de HEER staait hier zien gezaalfde.”
⁰⁷Mor de HEER zee tegen Samuël: “Ie mouten nait kieken hou of hai der oetzugt en hou groot of e is, want ik heb hom ofwezen. t Gaait ter ja nait om wat of n mensk zugt. Want n mensk zugt wat e veur ogen het, mor ik kiek noar t haart.”
⁰⁸Dou raip Isaï Abinadab en stelde hom aan Samuël veur. “De HEER het hom ook nait oetzöcht,” zee e.
⁰⁹Isaï stelde Samma aan hom veur. “Dizzent het de HEER ook nait op t oog,” zee Samuël.
¹⁰ Isaï stelde zien zeuven zeuns aan Samuël veur, mor Samuël zee tegen Isaï: “De HEER het heur nait oetzöcht.”
¹¹ Dou vruig Samuël: “Binnen dit aal joen jonges?” “Op jongste zeun noa. Hai is bie schoapen,” zee Isaï. “Loat hom hoalen,” zee Samuël. “Wie zellen nait begunnen veurdat hai der is.”
¹² Isaï luit hom hoalen. Jong haar n rözzeg veurkommen, wieder haar e mooie ogen, t was n knappe jongkerel. “Joa,” zee de HEER. “Dij is t. Zaalf hom.”
¹³ Samuël kreeg hoorn mit eulie en zaalfde hom doar aal zien bruiers bie wazzen. Van stonden òf aan kwam gaist van God over David. Samuël ging vot, weer noar Rama tou.