Braif aan Romaainen 06 :15-23

¹⁵ Wat nou? Zel we den mor aanzundegen, omdat we nait onder wet stoan, mor onder genoade? Niks ter van!
¹⁶ As ie bie ain in dainst kommen as ondergeschikte, bin ie zien knecht en mout ie doun wat e zegt. Dat mag joe dudelk wezen. Mor nou, ain van baaident: ie kaizen veur zunde en dat lopt op dood oet, óf veur geheurzoamhaid en dat lopt oet op gerechteghaid.
¹⁷ Mor God daank, bin ie gain knecht meer van zunde! Nou heb ie joe van haarten schikt noar t leefpetroon dat God joe leren luit.
¹⁸ Vrij van zunde bin ie worden en in dainst kommen van gerechteghaid.
¹⁹ Ik bruuk mor beelden oet t alledoagse levent: k heb ja mit swakke mensken te doun. Krekt zo as ie joezulm vrouger in dainst van onnureghaid en lösbandeghaid steld hebben zodat ie joe aan gain wet of regel keerden, zo mout ie dat nou doun in dainst van gerechteghaid zodat ie joe op n haaileg levent touleggen.

²⁰ Dou ie zunde zien knecht wazzen, haar gerechteghaid gain vat op joe.
²¹ Nou, en wat het dat nou opsmeten? Aal dij dingen doar ie joe nou veur schoamen! t Draaide ja op dood oet.
²² Mor deurdat ie nou van zunde löskommen binnen en bie God in dainst, levert joe dat n haaileg gedrag op. Dat lopt op aiweg levent oet.
²³ Loon dat zunde betoalt, is de dood, mor wat God joe geft, is aiweg levent in gemainschop mit Christus Jezus, ons Heer.