Braif aan Romaainen 05 :12-21

¹² Doarom kin we n vergelieken moaken. t Is deur ain mensk dat zunde in wereld kwam, en deur dij zunde de dood. Zo kreeg dood ale mensken te pakken. Doar kregen ze heur zunde mit betoald.
¹³ Veurdat wet kwam, was ter ja al wel zunde in wereld. Mor zunde wordt joe nait aanrekend, as ter gain wet is.
¹⁴ Nee, mor van Adam òf, aan Mozes tou het dood ook macht had over mensken dij heur zunde ja nait geliek stellen kinnen mit Adam zien overtreden. Nou staait dij model veur hom, dij kommen zol.
¹⁵ Toch kin dij misstap nait tegen genoadegoave aan. Al binnen deur ain zien misstap k-wait-nait-houveul mensken sturven, helftemeer is God zien genoade k-wait-nait-houveul mensken te goude kommen. En dat geldt zodounde ook van wat of hai in dij genoade van ain mensk, Jezus Christus, geft.
¹⁶ Wat dij aine deur zien zunde aanricht het, kin nait aan tegen (God zien) geschenk. Dou ja op dij aine zien doad t vonnes kwam, draaide dat oet op n veroordailen. Mor dou noa n haile bult misstappen God mit zien goave kwam, draaide t oet op vrijsproak.
¹⁷ Deur dij aine zien misstap mag den dood aan macht kommen wezen – deur dij aine! – zoveulstemeer zellen nou leventege mensken aan macht kommen deur dij aine: Jezus Christus. En dat geldt dijent, dij zoveul gunst touvaalt dat ze vrijsproak veur niks hebben.
¹⁸ Wie moaken reken op: net as t deur ain misstap veur ale mensken oetdraaide op n veroordailen, zo draaide t deur ain rechtveerdege doad veur ale mensken oet op vrijsproak. Doar wer heur t levent in gund.
¹⁹ Net as ja deur ain zien ongeheurzoamhaid k-wait-nait-houveul mensken zundoars werden, zo zellen deur ain zien geheurzoamhaid k-wait-nait-houveul mensken rechtveerdeg worden.
²⁰ Nou is wet ter wel bie kommen, dat ter mor meer as misstap aan t licht kommen zol. Mor doar zunde aanwos, het genoade der nog n schep bovenop doan.
²¹ Den kin, net as zunde deur dood heur macht gelden dee, zo ook genoade deur vrijsproak heur macht gelden doun en ons zo aiweg levent geven deur Jezus Christus, ons Heer.