09Dij naacht zee de HEER tegen Gideon: “In t èn! Goa op heur bivak lös! Ik geef heur in dien macht.
10 Mor mogstoe der tegenaan zain aanvaal te woagen, goa der den eerst zulm op òf mit Pura, dien knecht.
11 Den kinst heuren woar of ze t over hebben. Dat zel die moud geven om t kaamp aan te valen.” Mit zien twijbaaident gingen Gideon en zien knecht Pura der op òf, tot stoef bie veurposten van vijand.
12 Midjanieten en Amalekieten en nog aander volken oet t oosten wazzen as sprinkhoanen op vlakte deelstreken. Heur kemélen allain al wazzen nait te tellen: net zoveul as zaandkorrels bie zee.
13 Dou Gideon aankwam, was ter krekt ain aan t vertellen wat of e dreumd haar. “Wat k nou toch dreumd heb,” zee e. “n Koornbrood rolde as roazend tou ons kaamp in. Hai botste tegen n tènt aan en keerde dij ondersteboven. En woeps, doar lag mie tènt.”
14 “Dat kin aans niks mainen as t sweerd van Isreliet Gideon, Joäs zien zeun,” zee zien moat. “God het ons, mit t kaamp en aal, in zien macht geven.”
15 Dou Gideon dreum en oetleg heurd haar, boog e zok dankboar deel. Weerom in t bivak pittjede hai Isrelieten aan: “In t èn! De HEER geft t kaamp van Midjan in joen macht!”
16 Hai verdailde de drijhonderd man in drij plougen en gaf elk van heur n ramshoorn en n lege wotterkroek mit n brandende fakkel der in.
17 Dou zee e: “Kiek goud noar wat ík dou. Zo gaauw as ik bie veurposten van t bivak kommen bin, mout ie net zo doun as ik.
18 Bloazen wie, ik en mien ploug, op ramshoorn, den mout ie dat ook op joenent doun om t haile bivak tou, en roupen: ‘Veur de HEER en veur Gideon!’”
19 Middel in naacht kwam Gideon mit zien honderd man bie veurposten van t kaamp aan. Vlak noa t oflözzen van wacht begunden ze op heur ramshoorn te bloazen en sluigen ze kroeken aan diggels.
20 Ale drij plougen begunden op heur ramshoorn te bloazen en sluigen heur kroeken stokkend. Fakkels haren ze in linkerhaand en ramshoorns in rechter en ze raipen zo haard as ze konden: “Vaal aan! Veur de HEER en veur Gideon!”
21 Elk bleef stoan doar e ston, rondom t bivak tou, en ze brochten Midjanieten in paniek, dat elkenain perbaaierde der tussenoet te naaien. En bèlken dat ze deden!
22 In tied dat dij drijhonderd Isrelieten op heur ramshoorn bloazen deden, zörgde de HEER der veur dat Midjanieten in t haile bivak mit t sweerd op nkander insluigen. Op t leste ging t leger der vandeur, kaant op van Serera, noar Bet-Hassitta tou, aan kaant van revier bie Abel-Mechola, boven Tabbat.