t Evengelie volgens Matteüs 14 :13-12

¹³ Dou Jezus dit heurd haar, stapte hai in boot en ging noar n ainzoam stee tou doar e allenneg wezen kon. Mor t volk heurde dit en ze kwammen tou steden oet en gingen over laand achter hom aan.
¹⁴ Dou e tou boot oetstapte, zag e n haile koppel volk. Hai kreeg slim mit heur te doun en muik heur zaiken beter.

¹⁵ Tegen oavend kwammen leerlingen hom zeggen: “t Is hier n ainzoam stee en t is al loat worden. Stuur t volk vot. Den kinnen ze in heur aigen loug eterij kopen.”
¹⁶ “Ze huiven nait votgoan,” zee Jezus. “Zörg ie der mor veur dat ze te eten kriegen.”
¹⁷ “Wie hebben aans niks bie ons as vief broden en twij viskes,” zeden ze.
¹⁸ “Breng dij hier mor,” zee e.
¹⁹ Hai bestelde heur altmoal, dat ze zollen in t gras zitten goan. Hai pakte dij vief broden en dij twij viskes, keek noar hemel op en beedde zegen der over. Hai brook broden, gaf dij aan leerlingen en leerlingen gavven dij weer deur aan mensken.
²⁰ Ze atten heur altmoal zat. Brokken dij over wazzen, huilen ze op: twaalf körfvol.
²¹ Der wazzen doar, vraauwlu en kinder nait mitrekend, zo’n viefdoezend man dij eten hebben.