Matteüs 14:1-12

¹In dij tied heurde vörrelkeunenk Herodes wat over Jezus verteld wer.
⁰²Hai zee tegen zien knechten: “Dat is Johannes de Deuper! Hai is oet doden opwekt en doarom waarken dij krachten in hom.”
⁰³Herodes haar Johannes ja oppakken loaten en aan kettens legd. Hai haar hom in t gevang opsloten om Herodias, vraauw van zien bruier Filippus.
⁰⁴Johannes haar tegen hom zegd: “Ie maggen heur nait as joen vraauw hebben.”
⁰⁵Hai wol Johannes ainlieks van kaant moaken, mor om t volk duurde hai dat nait aan. Zai dochten ja dat e n profeet was.

⁰⁶Mor dou Herodes joareg was, daansde Herodias heur dochter wat veur gasten en dat was Herodes zo braid noar t zin
⁰⁷dat e zee: “Kinst kriegen wastoe wilst! k Dou der n aid op!”
⁰⁸Dou zee t wicht: “Geef mie hier op n schuddel kop van Johannes de Deuper!” Heur moeke haar heur ja opsteukeld.
⁰⁹Hou stoer keunenk t ter ook mit haar, hai bestelde om dij aan heur te geven. Hai haar der ja n aid op doan doar ale gasten bie wazzen.
¹⁰ Hai luit Johannes in t gevang kop ofhaauwen.
¹¹ Kop wer op n schuddel aan t wicht geven. Dij brochde hom noar heur moeke tou.
¹² Johannes zien leerlingen gingen noar gevangenis, huilen t liek op en begruiven hom. Dou brochten ze tieden aan Jezus.