t Evengelie volgens Matteüs 8 : 14-22

¹⁴ Jezus kwam in t hoes van Petrus en zag zien schoonmoeke mit koors op bèr liggen.
¹⁵ Hai pakte heur bie haand, en vot was koors. Zai kwam in t èn en bedainde hom.
¹⁶ Dou t oavend worden was, brochten zai veul lu bie hom dij bezeten wazzen. Mit n enkeld woord dreef hai kwoade gaisten oet. En dij der slim aan tou wazzen, muik e altemoal beter.
¹⁷ Deur dat aal wer woarhaid wat of profeet Jesaja zegd het: “Hai het ons swakheden op zok nomen en ons kwoalen het e droagen.”

¹⁸ Dou Jezus veul volk om zok tou zag, bestelde hai heur vot te goan noar overkaant.
¹⁹ Der kwam n schriftgeleerde op hom òf. “Meester,” zee e, “woar den ook noar tou, ik zel achter joe aan goan!”
²⁰ Jezus zee tegen hom: “Vozzen hebben holen en vogels van hemel hebben nusten. Mor Menskenzeun het gain stee om zien kop deel te leggen.”
²¹ Mor n aander, ain van zien leerlingen, zee tegen hom: “Heer, mag k eerst mien voader begroaven?”
²² “Goa achter mie aan,” zee Jezus, “en loat doden heur doden begroaven.”