t Evengelie volgens Matteüs 8 : 23-34

²³ Jezus stapte in boot en ale leerlingen gingen achter hom aan.
²⁴ En begunt mie t doar op t meer nait inains balderachteg te störmen! Dat golven sluigen over haile boot hèn. Mor Jezus slaip deur ales hèn.
²⁵ Zai muiken hom wakker. “Heer!” raipen ze, “red ons! Wie verzoepen!”
²⁶ “Woarom bin ie baang?” zee e, “joen geleuf is mie nait veul weerd!” Dou kwam e in t èn en toalde wind en wotter stief tou. Dou wer t haile stil.
²⁷ Mensken zeden verboasd: “Wat veur ain is dizzent dat ook wind en wotter noar hom lustern doun?”

²⁸ Dou hai aan overkaant in kontrainen van Gardareners kommen was, kwammen hom twij bezeten lu oet grafsteden in muit. Zokke aibels gevoarleke lu dat gainent doar verbie duurde.
²⁹ “Wat heb ie tegen ons in t zin, Zeun van God?” bèlkten zai. “Wil ie ons veurtiedeg tamtaaiern?”
³⁰ Wied van heur vandoan laip n grode koppel swienen te waaiden.
³¹ Kwoaie gaisten vruigen hom (mit ale noadrok): “As ie ons oetdrieven willen, loat ons den in dij koppel swienen kroepen.”
³² “Tou mor!” zee hai tegen heur. Zai gingen der oet, kropen in swienen en loat nou haile koppel bie staaile waand omdeel tou t meer in stoeven en verzoepen!
³³ Swiendrievers gingen der vandeur, kwammen in stad en vertelden t haile verhoal. Ook van dij bezeten lu.
³⁴ Haile stad laip Jezus in muit. Dou ze hom zagen, vruigen ze hom tou heur kontrainen oet te goan.