1 Samuël 20:24-34

²⁴ David verkroop zok in t veld. Dou t Duustermoan worden was, ging keunenk aan toavel om te eten.
²⁵ Hai ging op t stee zitten doar e aaltied zat, bie muur. Jonatan zat tegen hom over en Abner ging noast Saul zitten. David zien stee bleef leeg.
²⁶ Dij dag zee Saul der niks van. Hai dochde: Der is hom wat overkommen. Hai is nait raain. Joa, dat zel t wezen: hai is onraain.
²⁷ Mor dou doags nou Duustermoan David zien stee leeg bleef, vruig Saul aan zien zeun Jonatan: “Woarom het Isaï zien zeun guster nait, en vandoag weer nait mit ons aan toavel zeten?”
²⁸ “David het mie oetdrokkelk permizzie vroagd,” antwoordde Jonatan, “om noar Betlehem tou te goan.
²⁹ Hai zee: ‘Loat mie toch goan want ons haile geslacht het n ovverfeest in dij stad. Mien bruier het zulm zegd, dat ik kommen mos. Dat astoe t goud mit mie veurhest, loat mie den goan om mien bruiers op te zuiken.’ Doarom is hai nait opdoagen kommen om bie keunenk te eten.”
³⁰ Dou wer Saul hoagels op Jonatan: “Doe miesgaster! Haar k t nait docht dastoe kaizen zolst veur zeun van Isaï? Doardeur hestoe diezulm en de schoamte van dien moeke tou schaande moakt.
³¹ Mor wait dit, zo laank as zeun van Isaï leeft, zelstoe en dien keunenkschop nait bestoan kinnen. Breng hom hier! Dood zel e!”
³² “Woarom toch? Wat het e den doan?” vruig Jonatan.
³³ Mor Saul gooide zien spies noar hom, om hom dood te moaken. Dou wos Jonatan dat zien voader t vaast in t zin haar om David om haals te brengen.
³⁴ Haildaal vergrèld ging e bie toavel vot. Doags noa Duustermoan at e niks, want hai haar verdrait om David en omdat zien voader hom, Jonatan, min behandeld haar.