Psaalm 79

⁰⁰¹n Psaalm van Asaf.
O God, volken binnen binnenvalen,

zai hebben joen haailege tempel onteerd,

van Jeruzalem n stainbult moakt.

⁰⁰²Zai hebben lieken van joen knechten
as eten aan roofvogels geven,

t vlaais van joen volgelingen

aan wilde daaiern.

⁰⁰³Zai hebben bloud vergoten as wotter
om Jeruzalem tou – en der was gainain dij heur begruif.

⁰⁰⁴Wie worden veur noabervolken te schaande moakt,
van ale kanten beschimpt en bespot.

⁰⁰⁵Hou laank nog, HEER! Blief ie veur aaltied vergrèld?
Blift joen ofgunst aaltied branden as vuur?

⁰⁰⁶Gait joen grammiedeghaid oet over volken dij joe nait kennen,
over keunenkrieken dij joen noam nait aanroupen,

⁰⁰⁷want zai hebben Jakob opeten
en t woonstee verrinnewaaierd.

⁰⁰⁸Reken ons ongerechtegheden van t veurgeslacht nait aan,
loat joen meedlieden ons gaauw in muit kommen,

want wie hebben niks meer bie te zetten,

⁰⁰⁹help ons, God van ons haail, om eer van joen noam,
red ons en moak t weer goud mit ons, om joen noam.

⁰¹⁰ Woarom zollen volken zeggen: “Woar is heur God?”
Loat ons blieken, loat dij volken waiten,

dat vergoten bloud van joen knechten vroken wordt.

⁰¹¹ Loat t schraiven van dij gevangen zitten tot joe deurdringen,
loat dij ten dode opschreven binnen, t overleven zo as t in joen macht ligt.

⁰¹² Geef ons noabers zeuven moal weerom
heur spot, doar zai joe mit veur spot zet hebben.

⁰¹³ Mor wie, joen volk, schoapen van joen waaide,
wie zellen joe veur aaltied priezen,

van geslacht op geslacht zel wie lofzang op joe holden.