1 Samuël 17:31-40

³¹ Dou ze heurden wat of David zegd haar, wer t overbraifd aan Saul. Dij luit hom hoalen.
³² David zee tegen Saul: “Loat gainain om hom de moud verlaizen. Joen knecht zel mit dizze Filistijn vechten.”
³³ “Doe zelst nait op kinnen tegen dij Filistijn,” zee Saul, “want doe bist nog jong en hai is al van jongsòf aan n kriegsman.”
³⁴ Mor David antwoordde: “Joen knecht het aaltied op schoapen van zien voader paast. As ter den n laiw of n beer aankwam dij n schoap oet koppel vothuil,
³⁵ den ging ik der achterheer, versluig hom en redde t oet zien bek. As e mie den pakken wol, greep k hom bie zien board en sluig hom dood.
³⁶ Joen knecht het zowel n laiw as n beer doodhaauwen. Dizze onbesneden Filistijn zel t krekt zo vergoan, omdat hai de slagordes van de God dij leeft, taargd het.
³⁷ De HEER, dij mie red het oet laiw en beer heur klaauwen, hai zel mie ook redden oet haand van dizze Filistijn.” “Tou den mor,” zee Saul. “De HEER zel mit die wezen.”
³⁸ Dou dee e David zien aigen woapenrok aan, zette hom n kopern helm op en dee hom n paanzer aan.
³⁹ David dee zien sweerd om over zien woapenrok hèn en wol der mit lopen, want dat haar e ja nog nooit perbaaierd. “Hier kin k nait in lopen,” zee David. “Zo’n ding heb k ja ook nog nooit aan had.” Hai dee hom weer oet,
⁴⁰ pakte zien stòk, zöchde zok vief gladde stainen tou beek oet en dee ze in zien hedderstaas dij e bie zok haar. Slinger huil e in haand. Zo ging e op Filistijn òf.