1 Samuël 9 :11-25

¹¹ Mit dat zai pad noar stad tou omhoog gingen, kwammen ze wichter tegen dij wotter hoalen gingen. “Is zainder hier ook?” vruigen ze.
¹² “Joa,” zeden wichter. “Hai is stoef bie. Hoast joe, want hai is vandoag noar stad tou kommen omdat t volk n ovvermoal op högte het.
¹³ Mit dat ie in stad kommen, zel ie hom wel vinden, veurdat hai bie högte opgaait om te eten. t Volk gaait ja nait eten veur en aleer hai der is. Hai zel t ovver zegen en den zellen lu dij nuigd binnen, eten goan. Goa der mor hèn. Ie zellen hom vot wel vinden.”
¹⁴ Dou ze in stad kwammen, kwam Samuël dij net onderwegens was om bie högte op te goan, heur in muit.
¹⁵ De HEER haar doags veurdat Saul kwam, Samuël bekendmoakt:
¹⁶ “Mörgen om distied zel k joe n man oet Benjamin sturen. Dij mout ie as laaider zaalven over mien volk Israël. Hai zel mien volk verlözzen oet Filistijnen heur macht. Want ik heb om mien volk docht omdat ik heur hulpgeroup heurd heb.”
¹⁷ Dou Samuël Saul zag, luit God hom waiten: “Kiek, doar is nou de man doar k joe van zegd heb: ‘Dizzent zel over mien volk regaaiern.’”
¹⁸ Midden in poort kwam Saul op Samuël òf en zee: “Wait ie ook woar zainder woont?”
¹⁹ “Ik bin de zainder,” antwoordde Samuël. “Goa mor veur mie oet bie högte op en eet vandoag mit mie. Mörgenvroug zel k joe goan loaten en over ales doar ie joe drok over moaken, zel k joe kloareghaid geven.
²⁰ Wat ezelinnen aanbelangt dij ie al drij doag kwiet binnen, moak joe doar nou mor nait laanger zörgen over want dij binnen weer op stee. Mor aan wèl heurt ales tou wat in Israël t begeren weerd is? Is t nait van joe en van joen voader zien haile hoes?”
²¹ “Heur ik nait tou Benjamin, t klaainste van ale geslachten,” zee Saul, “en is mien femilie nait ain van onbedudenste van ale femilies in Benjamin? Woarom proat ie den op zo’n menaaier tegen mie?”
²² Samuël nam Saul en zien knecht mit, brochde heur noar feestzoal en gaf heur n stee bovenaan, woar lu zatten dij nuigd wazzen, zowat datteg man.
²³ Tegen kok zee Samuël: “Breng mie dat stok vlaais dat ik joe geven heb en doar ik van zegd heb: ‘Leg t aan zied.’”
²⁴ Dou dainde kok scholderstok op en zette t Saul veur. “Wat wie veur joe achteroet holden hebben, wordt joe veurzet,” zee Samuël. “Eet, want t is veur joe bewoard veur dizze gelegenhaid, dou k zee: ‘Ik heb t volk nuigd.’” Zo at Saul op dij dag mit Samuël.
²⁵ Dou gingen zai van högte òf noar stad tou. En Samuël pruit mit Saul op t dak.