24 Op t heden vernuver ik mie mit wat of ik oetstoan mout veur joe. In wat of ik op hoed krieg vul ik aan – om wat weerom te doun – wat of Christus aan verdrokkens te kòrt kommen was. En dat dou ik veur zien liggoam: kerk.
25 Bie dij bin ik in dainst. Dij toak het God mie geven mit t oog op joe: dat ik wat of God beloofd haar nou noakommen mag,
26 dat gehaaim dat al aiwen en generoatsies laank bezied holden was. Mor nou is t aan t licht brocht veur dijent dij bie hom heuren.
27 Dij wol God waiten loaten hou zo’n schitternde riekdom dat gehaaim in haaidenwereld brengen zol. Aans zegd: wat Christus in joen levent betaiken zol: zo’n heerlek veuroetzicht!
28 Dij Christus verkundegen wie. Den vermoan we elkenain en onderwiezen elkenain in alderhande wieshaid. Wie willen ja geern elkenain veur God verschienen loaten as n mensk dij Christus haildaal geef moakt het.
29 Doar schrip ik den ook veur; doar gooi ik mie op mit ale kracht dij hai in mie lösmoakt. En dat dut e nait zuneg!
2a va 1-2va* Aan haailegen dij in Kolosse touholden, ons traauwe bruiers en zusters in Christus.
2b va va* Ik wèns joe genoade en vree noamens God ons Voader.
01Ie mozzen ja ais waiten hou of ik mie mit ale geweld inspan veur joe, veur lu in Laödicea en veur zoveul aandern dij mie persoonlek nait kennen.
02Ik dou zoks om heur te bemoudegen, heur in laifde bie nkander te brengen en heur zo wied te kriegen, dat ze volle riekdom besevven van wat of ze zeker waiten; dat ze inzicht kriegen in God zien gehaaim: Christus.
03In hom ligt ja t haile kaptoal aan wieshaid en kennes opburgen.
04Ik zeg dit om veur te kommen dat ie joe van wies brengen loaten deur mooie proatjes.
05Liggoamelk bin k ter wel nait, mor in gedachten bin k wel bie joe, en k bin blied dat k zai hou zo’n odder der bie joe is en hou vaast joen geleuf in Christus is.