04God, de HEER, het mie leerd hou of k proaten mout,
om weer op te fleuren lu, dij aan t èn binnen.

Mit ain woord moakt hai mie smörgens wakker,

smörgens schaarpt hai mien oren

dat ik as n schouljong goud lustern zel.

05God, de HEER, het mie t oor open doan
en ik heb mie nait verweerd,

ik bin der nait veur weken.

37 Dou ze aanderdoags van baarg ofkwammen, kwam heur n bult volk in muit.
38 Doar begunde maank t volk n man te roupen: “Meester, ik smeek joe, kiek toch es noar mien jong!
39 t Is ja mien ainegst kind. En mout je ais begriepen, bietieden gript n gaist hom beet en veurdat je der op verdocht binnen giert e t oet. Hai brengt hom in termienen, zodat e t schoem op mond krigt. En hai let hom sikkom nait weer lös. En den slagt e hom bont en blaauw.
40 k Heb joen leerlingen al vroagd, ze zollen hom der oetjoagen. Mor dij konden t nait veurnkander kriegen.”
41 Dou zee Jezus: “Ie ongeleuveg en dwaars slag volk! Hou laank mout ik nog maank joe touholden en joe verduren. Breng joen jong es hier heer!”

28 n Dag of aacht noadat e dat zegd haar, nam e Petrus en Johannes en Jakobus mit baarg op om te beden.
29 En onder t beden kreeg zien gezicht n aander aanblik. Zien klaaier werden stroalend wit.
30 Op ainmoal stonden der twij manlu mit hom te proaten. t Wazzen Mozes en Elia.
31 Ze verteunden zok in heerlekhaid en zeden hom t leste èn van zien levensweg aan dat e in Jeruzalem oflopen zol.
32 Nou wazzen Petrus en dijent dij bie hom wazzen, min van sloap. Mor inains werden ze glìn wakker en zagen hom in zien heerlekhaid mit de baaide manlu dij bie hom stonden.

18 n Moal dou hai allain in gebed was en leerlingen bie hom wazzen, vruig hai heur: “Wat zeggen lu wèl of ik bin?”
19 Zai zeden: “Johannes de Deuper. Paardie zeggen: Elia. Weer aandern: ain van olde profeten dij opstoan is.”
20 Hai zee tegen heur: “En ie den, wat zeg ie wèl of ik bin?” Dou zee Petrus: “God zien gezaalfde.”
21 En hai woarschaauwde heur, ze zollen dit tegen gain mensk zeggen.
22 “Menskenzeun mout veul lieden,” zee e, “en deur oldsten en opperpriesters en schriftgeleerden verstöt worden. Hai zel ombrocht worden en op daarde dag opwekt worden.”

10 Dou apostels weeromkwammen, vertelden ze hom aal wat of ze oetricht haren. Hai nam heur allain mit en zunderde zok mit heur òf in n stad, Betsaïda.
11 Dou lu dat gewoarwerden, gingen ze hom achternoa. Hai luit heur bie zok kommen en pruit mit heur over God zien riek. Dij hulpen worden mozzen, muik hai beter.
12 Dou t tegen oavend laip, kwammen de twaalm bie hom en zeden tegen hom: “Stuur t volk vot! Den kinnen ze noar dörpen en ploatsen hieromtou goan en doar onderdak en eten kriegen. Wie binnen hier ja op n ainzoam stee.”
13 Mor hai zee tegen heur: “Geef ie zulm heur eten!” Zai zeden: “Wie hebben ja aans niks bie ons as vief broden en twij vizzen. Den zol wie hèngoan mouten en kopen veur aal dit volk eten.”

01Dou raip e de twaalm bie zok en gaf heur kracht en volmacht over ale kwoaie gaisten en zaiken.
02Hai stuurde ze der op oet om God zien riek oet te roupen en om zaiken beter te moaken.
03Hai zee tegen heur: “Neem niks mit veur onderwegens. Gain stòk en gain mat. Gain brood en gain geld. Ie maggen ook gain twij onderklaiden bie joe hebben.
04Neem ie joen intrek woaraarns in n hoes, blief doar den en raais doarvandoan wieder.
05Tegen ale mensken dij joe der nait in hebben willen, mout ie as ie oet dij stad votgoan, t stof van joen vouten ofschudden as bewies van heur schuld.”
06Zai gingen van loug noar loug, preekten t evengelie alerwegens en muiken zaike lu beter.

01Of proat ik ook ale toalen van mensken en engels – as ik gain laifde heb, den bin ik n dreunende trom of n rinkelnd bekken. 02Of heb ik ook de goave dat ik profetaaiern kin en wait ik ale gehaaimen, joa aal dat ter te waiten is, en of heb ik ook n onbepaarkt vertraauw zodat ik baargen oetzied zetten kin – as ik gain laifde heb, den bin k gain stuver weerd. 03Of zol k ook aal mien goud (onder aarme mensken) verdailen, en of zol k mien levent beschikboar stellen om der van snaren te kinnen – as ik gain laifde heb, den helpt mie dat gain spier. 04Laifde het laank geduld. Laifde is vrundelk. Ze is nait niedsk, snidt nait op, is nait grootsk. 

27 bepoalden Jeuden en aanveerdden zai as veurschrift veur zokzulm en veur heur noageslacht en veur elkenain dij zok bie heur aansloeten zol, dat zai zunder mekaaiern ale joaren dizze baaide doagen vieren zollen zo as heur veurschreven was en op tied dij der veur steld was,
28 en ook dat herdenken en vieren van dizze doagen in ale geslachten, in ale gezinnen en in ale steden wezen zol, om dizze Poerimdoagen nait bie Jeuden in onbruuk roaken te loaten en herinnern bie t noageslacht nait verkommern te loaten.

16-17 Aander Jeuden in gewesten van keunenk verzoamelden zok ook. Zai verdedegden zok om mit rust loaten te worden deur heur vijanden. Op dattiende dag van adarmoand muiken zai vievenseuventegdoezend man dood van heur vijanden, mor aan heur goud kwammen zai nait. Op n vattienden rustten zai oet en zai muiken doar n dag van mit feestmoal en bliedschop.
18 Mor Jeuden in Susa verzoamelden zok op n dattienden en op n vattienden van dij moand. Zai rustten op vieftiende dag en muiken der n dag van mit feestmoal en bliedschop.
19 Doarom vieren Jeuden op t laand, dij nait in ommuurde steden wonen, vattiende dag van moand adar as n dag van bliedschop en feestmoal en as n dag dat men nkander wat geft.

01Op dattiende dag van twaalfde moand, moand adar, dou woord en wet van keunenk in doaden omzet worden zollen, op dag doar vijanden van Jeuden van hoopt haren dat zai heur der onder kriegen zollen, mor t krekt aansom ging, en t n dag wer dat Jeuden boas werden over dij, dij heur hoatten,
02op dij dag kwammen Jeuden bie mekoar in heur steden in ale gewesten van keunenk Ahasveros om dijent om te brengen dij op heur onhaail oet wazzen. Gainain kon standholden tegen heur, want schrik veur heur haar ale volken te pakken.
03Ale bestuurders van pervinzies, stadholders, landvoogden en amtenoars van keunenk kozen kaant van Jeuden, omreden schrik veur Mordechai haar heur te pakken kregen.
04Want Mordechai was n groot man in t pelaais van keunenk en zien foam verbraaidde zok in ale gewesten, hai kreeg aal mor meer te zeggen.
05Mit sweerden richtten Jeuden n slachten aan maank heur vijanden en brochten dood en verdaarf, mit dij heur hoatten deden ze wat ze wollen.
06In börg van Susa hebben Jeuden viefhonderd man doodmoakt en oetreud .