Numeri Dochters van Selofchad maggen ook aarven (27:1-11 )

Numeri 27

⁰¹n Keer kwammen dochters van Selofchad der over tou. Selofchad was n zeun van Chefer, zeun van Gilead, zeun van Machir, zeun van Manasse. Wichter haitten Machla, Noä, Chogla, Milka en Tirsa.
⁰²Ze verschenen veur Mozes, priester Eleazar, laaiders en haile gemainschop bie ingang van soamenkomsttènt en zeden:
⁰³“Ons voader is in woestijn sturven, schoon dat e nait bie Korach zien aanhang was dij tegen de HEER in opstand kwam, mor hai is sturven om zien aigen zunde. Hai haar gain zeuns.
⁰⁴Woarom zol noam van ons voar verswinnen oet geslachten, omreden hai het gain zeun? Geef ons n lap grond in aigendom, net as bruiers van ons voar.”
⁰⁵Mozes legde heur zoak veur aan de HEER.
⁰⁶De HEER zee tegen Mozes:
⁰⁷“Wichter van Selofchad hebben t goud veur. Most heur vanzulm ook n stok grond in bezit geven net as bruiers van heur voader. t Aarfdail dat heur voader aans kregen haar, most aan heur overdroagen.
⁰⁸En most tegen Isrelieten zeggen: 'As ain overlidt en dij het gain zeun, mout ie t bezit overdoun aan zien dochters.
⁰⁹En as e gain dochter het, mout ie zien bezit aan zien bruiers geven.
¹⁰ En as e gain bruiers het, mout ie zien bezit aan bruiers van zien voader geven.
¹¹ En as zien voader gain bruiers het, mout ie zien bezit aan sibste femilie geven, dat dij t krigt. Dit is n rechtsregel veur Isrelieten, zo as de HEER Mozes besteld het.'”