Braif aan Hebreeërs 05
11 Der is nog veul meer over te zeggen, mor t is stoer om t oet te stokken: t duurt ja zo laank veurdat ie t onder pet hebben!
12 Ie haren, noar tied rekend, ja al laank zulm leermeesters wezen mouten. Mor ie hebben der meer verlet om dat men joe t ABC van God zien bosschop biebrengt. t Is zo wied kommen, dat ie mouten weer aan vlès. Stevege kost kin ie ja nait verdroagen.
13 Elk dij nog aan vlès is, het gain wait van goud of kwoad: dij is nog mor n lutje potje.
14 Mor grode mensken kriegen stevege kost. Dij hebben heur vermogens bruken leerd om onderschaaid te moaken tussen goud en kwoad.
01Loat we doarom t begun van Christus zien leer loaten veur wat of t is en t gaauw hebben over t èn en t doul der van. Wie willen nait vannijs grondloag leggen: t joe ofkeren van n menaaier van leven dij oetlopt op dood en van geleuf in God.
02Net as van t onderricht over deup, van t opleggen van handen, opstanden van doden en t aiweg oordail.
03En dat zel we doun, as God t toustaait teminnent.
4-6 Want as mensken ainmoal t licht zain hebben en toch weer ofvalen binnen, den bestaait t nait dat ze vannijs tou bekeren brocht worden. Ook al hebben ze van hemelse goaven pruifd en dail kregen aan hillege Gaist en aan God zien goie woord en kracht van aankommende wereld. Zai sloagen ja God zien Zeun zo te reken nog n moal aan t kruus en zetten hom veur gek.
07t Is net zo as mit n lap laand: dat zogt regen op dat ter ieder moal op vaalt. Dat brengt boeren dij t laand beaarbaiden, goie vrucht op. Op zo'n lap ligt God zien zegen.
08Mor laand dat doorns en stiekels oplevert, het gainain wat in reken. Den is t net of ter n vluik op ligt en op t lest gaait brand ter in.
