2 Makkabeeërs Judas zien stried tegen Idumeeërs (10:9-23)

2 Makkabeeërs 10

⁰⁹Hierboven is beschreven hou of goddeloze Antiochus, ook bekend as Epifanes, dood von.
¹⁰ Nou zel we oetstokken wat ter gebeurde onder zien zeun Antiochus Eupator, woarbie wie ons bepaarken zellen tou oorlogen en aal ellèn dij doarvan kwam.

¹¹ Noadat Antiochus t keunenkschop van zien voader overnomen haar, benuimde hai as bestuurder Lysias, dij t bestuur en t kommando haar over Cele-Syrië en Fenicië.

¹² Aine Ptolemeüs Makron was eerste dij zok t löt van Jeuden aantrok en noa aal t onrecht dat heur aandoan was, perbaaierde n vreedzoame oplözzen te vinden.
¹³ Van dij gevolgen dat e deur Eupator zien trawanten bie keunenk aankloagd wer. Boetendes wer e bie dij gelegenhaid veur verroader oetmoakt, omdat hai doudestieds oet Cyprus, dat hom deur Filometor aanvertraauwd was, votgoan was en overlopen noar Antiochus Epifanes. Omreden t wer hom onmeugelk moakt zien amt mit eren woar te nemen, muik e n èn aan zien levent deur vergif in te nemen.

¹⁴ Gorgias wer aansteld as aanvoerder in Idumea. Hai haar n huurleger onder zok en greep elke gelegenhaid aan om oorlog tegen Jeuden te voeren.
¹⁵ Tougelieks muiken Idumeeërs zulm, dij beschikken deden over gunsteg legen vestings, t Jeuden lasteg. Ze boden vluchtelingen oet Jeruzalem onderdak en stelden ales in t waark om oorlog zo laank meugelk aan gaang te holden.
¹⁶ Mor Makkabeeër zien aanhang vruig God in n smeekgebed of hai zok aan heur kaant schoaren wol en trokken op tegen Idumeeërs heur vestings.
¹⁷ In n krachtdoadege aanvaal kregen ze t veurnkander vestings te bezetten, ale verdedegers weerom te drieven en elkenain dij heur in handen vuil, òf te slachten: ze brochten goud twinnegdoezend man om.
¹⁸ Toch wozzen nait minder as negendoezend Idumeeërs, mit ales wat ze neudeg wazzen om n beleg oetholden te kinnen, zok te verschaanzen in twij haile staarke toorns.
¹⁹ Makkabeeër luit Simon, Josefus en Zacheüs achter, mit genog volk om dij toorns te belegern en trok zulm wieder noar aander lougen, doar ze meer verlet om hom haren.
²⁰ Mor Simon zien manlu wazzen zo belust op geld dat ze n koppeltje Idumeeërs votgoan luiten dou dij heur n bedrag van seuventegdoezend drachmes aanbood.
²¹ Dou Makkabeeër dat vernam, raip e zien aanvoerders bie zok en beschuldegde heur der van, ze haren heur aigen bruiers verkocht. Nou ze heur vijanden ja votgoan loaten haren, zollen dij zok weer tegen heur keren.
²² Hai luit verroaders om haals brengen en vot doarnoa nam e baaide toorns in.
²³ Judas, dij as legeraanvoerder ales kloar kreeg wat e ondernam, luit in dij vestings meer as twinnegdoezend man ombrengen.