Twijde braif aan Korintiërs t Verschil tussen Paulus en onechte apostels (10:12-11:15)

Twijde braif aan Korintiërs 10

¹² Wie duren ons ja nait reken tou, of vergelieken mit paardie lu dij zokzulm aanrekomdaaiern zunder deur te hebben dat ze zok aan zokzulm meten en zok mit zokzulm vergelieken.
¹³ Dat zel wie nait doun: dat wie bie ons snaren gain bepoalde moat aanleggen. Nee, wie zellen moat aanleggen dij God ons toupaart het. En doar kom we ook mit aan joe tou.
¹⁴ t Is nait zo dat wie ons overmoateg oetrekken, omdat we joe aans nait berekken kinnen. Wie binnen ja ook toch aan joe toukommen mit t evengelie van Christus?
¹⁵ Wie snaren nait, deurdat we gain bepoalde moat aanleggen op wat aandern beschript hebben. Nee, wie hopen dat joen geleuf nog wat aanwast. En dat we den, as ie ons meten aan wat ons as regel steld is, bie joe in hoogte stoken worden; zo bot,
¹⁶ dat wie nog wieder vot as doar ie wonen, bliede bosschop brengen maggen. Den huif we nait groots te wezen op wat n aander aal ree moakt het noar regel dij hai mitkregen het.
¹⁷ As ain snaren wil, loat e dat den van de Heer doun.
¹⁸ Nait wèl zokzulm rekomdaaiert kin der mit deur, mor wèl deur de Heer rekomdaaierd wordt.

⁰¹Kon ie t mor hebben, dat ik mie n beetje haalfwies aanstel. Mor dat kin ie ook wel!
⁰²Dat ik zo veur joe in schrip bin dat het God mie ja ingeven. Der is ja mor ain doar ik joe mit in t span doan heb. Bie dij, Christus, mout ik joe as n zuvere moagd oflevern.
⁰³Mor woar of ik baang veur bin? Slaang het destieds Eva bedrogen mit zien filaaine streken. Zo kon ie joe der ook nog wel ais tou verlaaiden loaten joen zinnen nait laanger voloet (en zuver) op Christus te zetten.
⁰⁴As ja de eerste de beste n aander Jezus verkundegt as dij wie verkundegd hebben, of der wordt joe n aander Gaist toustopt as ie vrouger kregen hebben, of n aander evengelie as ie vrouger aannomen hebben, den loat ie dat mor mooi geworden.

⁰⁵Noar mien bereken dou ik in niks onder veur dij apostels van bovenste plaank.
⁰⁶k Mag den nait n eersteklas spreker wezen, in kennes stoa k mien manje wel. En dat heb we joe bie elke gelegenhaid aan aal kanten ook wel dudelk moakt.
⁰⁷Of heb ik ter verkeerd aan doan dat ik zulm n tree omdeelging om joe n tree omhoog te brengen? k Heb joe God zien bliede bosschop ja brocht, zunder dat joe t n sènt kostte.
⁰⁸Aander gemaintes heb k ropt; van heur loon aanpakt dat ik joe helpen kon.
⁰⁹Dou k bie joe was en verlet kreeg, heb ik gainent om oren zoest. Wat ik te min haar, dat kwammen bruiers oet Macedonië bieleggen. k Heb ter aan aal kanten veur oppaast joe tou last te wezen. En dat zel ook zo blieven.
¹⁰ t Is mie mainens – Christus kin t getugen: doar ik nou zo groots op bin, dat zel in kontrainen van Achaje gain mensk mie ontstrieden kinnen.
¹¹ Woarom nait? Omdat ik nait van joe hol? God wait wel beter!
¹² Mor wat ik nou dou, doar goa ik mit deur; om heur dij doar op oet binnen, kaans te benemen dat t liekt of stonden ze mit ons geliek as ze zo'n groot woord hebben.
¹³ Zokke lu binnen ja onechte apostels, aarbaiders doar je bedrogen mit oetkommen. Ze loaten t allain mor zo veurkommen, of wazzen ze Christus zien apostels.
¹⁴ En gain wonder! Alderdeegs Soatan dut zok ja veur as n engel van t licht.
¹⁵ t Huift joe gain nij te doun as zien haandlangers zok oetgeven veur rechtschoapen knechten. Mor t zel heur vergoan noar heur doaden.