Ezechiël Feesten en ovvers (45:18-46:15)

Ezechiël 45

¹⁸ Dit zegt God, de HEER: Neem op eerste dag van eerste moand n jonge bol, zunder lek of brek, en zuver doar t haailegdom mit van zunde.
¹⁹ Priester mout wat bloud van t ovverdaaier aan deurpost van tempel strieken, aan vaaier houken van grode omloop van t altoar en aan deurpost van poort noar t binnenplaain.
²⁰ Dou t zulfde op zeuvende dag van moand veur lu dij nait mit opzet zundegen of dat in heur onneuzelhaid doun. Zo mout ie tempel raain moaken.

²¹ Op vattiende dag van eerste moand mout ie Pesach vieren, t feest doar zeuven doag laank brood zunder gèst eten wordt.
²² Dij aigenste dag mout vorst n bol as zuvernsovver brengen: veur zokzulm en veur aal t volk van t laand.
²³ En op aal zeuven doag van t feest mout e n brandovver aan de HEER brengen: ieder dag zeuven bollen en zeuven bokrammen, zunder lek of brek, zeuven doag laank. En ieder dag ook nog n bok as zuvernsovver.
²⁴ As waaitovver mout ie bie ieder bol en bie ieder bokram n efa waait doun, en bie ieder efa waait n hin eulie.

²⁵ Van vieftiende dag van zeuvende moand òf aan, op t feest, mout e t aigenste doun: zeuven doag laank mout e zulfde zuvernsovvers, brandovvers, waaitovvers en eulie-ovvers brengen.

⁰¹Dit zegt God, de HEER: Oosterpoort van t binnenplaain mout zès warreldoagen dicht blieven, mor op sabbat en Duustermoansdag mout e opendoan worden.
⁰²Den komt vorst van boeten deur veurpertoal poort in. Hai stelt zok op bie deurpost van poort en priesters brengen zien brandovver en zien vree-ovver. Den mout e zok deelboegen op drumpel van poort en weer noar boeten tou goan. Poort mag tot aan oavend tou nait dichtdoan worden.
⁰³t Volk van t laand mout zok op sabbat en op Duustermoan bie tougang van dij poort deelboegen veur de HEER.

⁰⁴t Brandovver dat vorst op sabbat de HEER aanbudt, mout bestoan oet zès jonge rammen en n wazen ram, zunder lek of brek.
⁰⁵Bie wazen ram heurt n waaitovver van n efa waait, en bie jonge rammen n waaitovver zoveul as e missen kin, mit bie ieder efa waait n hin eulie.
⁰⁶Op Duustermoansdag mout t brandovver bestoan oet n jonge bol zunder lek of brek, zès jonge rammen en n wazen ram zunder lek of brek.
⁰⁷As waaitovver mout vorst bie ieder bol en bie ieder wazen ram n efa waait doun, bie jonge rammen wat e berappen kin, mit bie ieder efa waait n hin eulie.

⁰⁸Vorst mout ter deur veurpertoal van poort inkommen, en zulfde kaant langs weer noar boeten tou goan.

⁰⁹Mor as t volk op hoogtijdoagen noar de HEER toukomt om zok deel te boegen, mout dij der inkommen deur noorderpoort, en deur zuderpoort weer noar boeten tou goan. Dij der inkomt deur zuderpoort, mout deur noorderpoort weer noar boeten tou goan. Gainain mag weeromgoan deur aigenste poort doar e der inkwam, elkenain mout noar boeten tou goan deur poort dij der liek tegenover ligt.
¹⁰ Vorst mout as ze der inkommen mit heur mitgoan en tougelieks mit heur weer noar boeten tou goan.

¹¹ Op feesten en hoogtijdoagen heurt bie elke bol en bie ieder wazen ram n waaitovver van n efa waait, en bie jonge rammen zoveul as vorst missen kin, mit bie ieder efa waait n hin eulie.

¹² As vorst vrijwilleg n brandovver of vree-ovver brengen wil as vrijwillege goave aan de HEER, den mout oosterpoort veur hom opendoan worden en kin e zien brandovver en vree-ovver op aigenste menaaier brengen as e op sabbat wènd is. Zo gaauw as e weer noar boeten tou gaait, dut men poort achter hom dicht.

¹³ Breng doagelks n interram zunder lek of brek as brandovver aan de HEER, ieder mörgen vannijs.
¹⁴ En breng der ieder mörgen n ovver bie van ainzèsde efa waait en aindaarde hin eulie om deur waaitenmeel te mengen, as waaitovver veur de HEER. Dizze regels blieven aaltied gelden.
¹⁵ Ieder mörgen mouten priesters jonge ram, waaitovver en eulie opdroagen as n doagelks ovver.