Ezechiël De HEER zien verschienen weerom in tempel (43: 1-43:12)

Ezechiël 43

⁰¹Dou nam man mie mit noar oosterpoort.
⁰²En doar zag ik Israël zien God in aal glorie oet t oosten votkommen, mit n geluud as t boldern van zee. Eerde lichtte der haildaal van op.
⁰³Wat ik zag, leek op wat ik zain haar dou stad verrinnewaaierd wer en op wat ik zain haar bie t Kebardaip. Ik luit mie plat op grond valen.
⁰⁴Verschienen van de HEER in aal zien stoatsie ging deur oosterpoort in tempel.
⁰⁵Dou tilde n gaist mie op en brochde mie noar t binnenplaain, en ik zag dat haile tempel vol was mit de HEER zien glorie.
⁰⁶Dou man nog aaltied noast mie ston, heurde ik ain tegen mie proaten oet tempel vandoan:
⁰⁷“Manmensk, dit is stee van mien troon, stee doar ik mien vouten deelzet. Hier zel ik veur aaid wonen blieven maank Isrelieten. t Volk van Israël zel mien haailege noam nait meer ontwijden, zai nait en heur keunenks nait, mit heur ontraauw nait en nait mit lieken van heur keunenks in heur graftombes.f + Letterlek: “op heur högten”.f*
⁰⁸Ze zetten heur drumpel noast mien drumpel, en heur deurpost noast mien deurpost, allenneg n muur ston tussen ons in. Ze ontwijdden mien haailege noam mit heur minne gedrag en doarom heb ik heur in mien gram verrinnewaaierd.
⁰⁹Mor van nou òf aan zellen ze nait laanger ontraauw wezen en lieken van heur keunenks wied bie mie vandoan holden, dat ik veur aaid bie heur wonen kin.

¹⁰ Manmensk, vertel t volk van Israël over mien tempel, dat ze zok schoamen over heur minne gedrag. En loat heur t model noameten.
¹¹ As ze zok schoamen over ales wat ze doan hebben, moak heur den bekend mit indailen en ontwaarp van tempel, mit oetgangen en tougangen, mit haile indailen en mit aal bepoalens en veurschriften. Schrief t aalmoal veur heur op, dat ze t sekuur oetvoeren.
¹² Dit binnen veurschriften veur tempel. t Haile kontraain rondom tempel boven op baarg is alderhaailegst. Tot zo wied veurschriften veur tempel.”