1 Samuël Saul tou keunenk zaalfd (10: 1-16)

1 Samuël 10

⁰¹Samuël kreeg n kroekje mit eulie en goot dij over zien kop. Hai gaf hom n smok en zee: “De HEER het joe zaalfd as laaider over zien aarfdail.
⁰²As ie dommit weer aan raais goan, zel ie bie Rachel heur graf in Selsach in t laand van Benjamin, twij manlu trevven dij joe zeggen zellen: 'Ezelinnen doar ie om zöchten, binnen weer terecht. Joen voader zit nait meer in over ezelinnen, mor hai moakt zok zörgen om joe en vragt zok òf: Wat mout ik veur mien zeun doun?
⁰³As ie doarvandoan wiedergoan en bie ekkelboom van Tabor kommen, zel ie doar drij manlu trevven dij onderwegens binnen noar Betel, noar God. Ain van heur het drij bokjes bie zok, n aander drij broden en daarde het n kroek wien.
⁰⁴Ze zellen joe goidag zeggen en joe twij broden geven. Ie zellen ze van heur aannemen.
⁰⁵Den zel ie in Gibea-Elohim kommen, doar n ofdailen Filistijnen ligt. Mit dat ie stad inkommen, zel ie n koppel profeten tegen kommen dij bie högte deelgaait mit haarp, rinkelbèllen, floit en citer veurop. Ze zellen profetaaiern.
⁰⁶Den zel gaist van de HEER over joe kommen. Ie zellen mit heur profetaaiern en ie zellen n aander mensk worden.
⁰⁷As ie dizze taikens aalmoal mitmoakt hebben, mout ie doun wat joe veur handen komt. Want God is mit joe.
⁰⁸Ie mouten veur mie oet goan noar Gilgal. Doar zel k bie joe kommen om brandovvers en slachtovvers te brengen. Zeuven doag mout ie wachten, den kom ik bie joe en zeg joe wat ie doun mouten. ”

⁰⁹Mit dat Saul zok omdraaide om bie Samuël vot te goan, gaf God hom n aander haart. Aal dij taikens binnen dij dag veurvalen.
¹⁰ Dou ze doar in Gibea kwammen, kwam heur n koppel profeten in muit. Gaist van God kwam over hom en hai profetaaierde mit heur.
¹¹ Elkenain dij hom van vrouger kon, zag hou of hai mit profeten profetaaierde. Ze zeden tegen nkander: “Wat het dij zeun van Kis? Is Saul ook bie profeten?”
¹² Dou zee n man dij doar woonde: “Wèl is heur voader?” “Is Saul ook bie profeten?” is zodounde n sprekwoord worden.
¹³ Dou hai mit profetaaiern opholden was, ging e högte op.
¹⁴ n Oom van Saul zee tegen hom en tegen knecht: “Woar heb ie west?” “De ezelinnen zuiken,” zee Saul. “Mor dou wie zagen dat zai der nait wazzen bin we noar Samuël tou goan.”
¹⁵ “Vertel mie ais wat Samuël tegen joe zegd het,” zee Saul zien oom.
¹⁶ “Hai het ons doalek zegd dat ezelinnen terecht wazzen,” antwoordde Saul. Mor dat Samuël over t keunenkschop sproken haar, zee hai der nait bie.