t Evengelie volgens Matteüs Lamme man beder moakt (9: 1- 8)

t Evengelie volgens Matteüs 09

⁰¹Hai stook mit boot t meer over en kwam in zien aigen stad.
⁰²En kiek ais: lu brochten n lamme man noar hom tou. Hai lag op bèr. Jezus zag heur vertraauw en zee tegen lamme man: “Kop ter veur, beste man! Zunden binnen die vergeven.”
⁰³Paardie schriftgeleerden zeden onder nkander: “Dij man doar, lastert God!”
⁰⁴Jezus zag wel wat of ze dochten. Hai zee: “Woarom heb ie zokke kwoaie gedachten?
⁰⁵Wat is t makkelkste? Zeggen: zunden binnen die vergeven, of: stoan goan en lopen?
⁰⁶Mor ik zel joe zain loaten dat Menskenzeun macht het in wereld zunden te vergeven” – dou zee e tegen dij lamme man: “Goa stoan! Pak dien bèr en goa noar hoes tou.”
⁰⁷Loat e nou stoan goan en noar hoes tou lopen!
⁰⁸Mensken dij dat zagen stonden der versteld van. Ze prezen God dat e mensken zo'n macht geven haar.