Ezechiël Roemtes veur priesters (42: 1-42:14)

Ezechiël 42

⁰¹Dou nam man mie mit noar t boetenplaain, noar noordkaant, en brochde mie noar ziedpertoalen bie t achtergebaauw, aan noordkaant van binnenhof.
⁰²Ze haren n lengte van 100 èl, mit n brette van 50 èl, mit tougang op t noorden.
⁰³Gallerijen in drij verdaipens laggen bie t 20 èl braide binnenplaain langs en langs bestroate omloop van boetenplaain.
⁰⁴Veur ziedpertoalen was n gaang van 10 èl braid. Noar binnen tou was n deurgang van 1 èl, en tougangen wazzen op t noorden.
⁰⁵Bovenste ziedpertoalen wazzen klaainer, want gallerijen nammen van dij pertoalen meer vot as van onderste en middelste pertoalen van t gebaauw.
⁰⁶Ze vörmden drij verdaipens en haren gain zoelen, zo as plaainen dij aal haren. Doarom wazzen bovensten klaainer as ondersten en middelsten.
⁰⁷Noar t boetenplaain tou bie ziedpertoalen langs, laip n muur. Dij was 50 èl laank.
⁰⁸Lengte van ziedpertoalen aan kaant van boetenplaain was 50 èl, en tegen grode zoal over was dat 100 èl.
⁰⁹Onder dij ziedpertoalen was op t oosten n tougang veur wèl of ter van boetenplaain òf in wol.
¹⁰ Over brette van muur van t plaain noar t oosten, bie binnenhof en bie t gebaauw, wazzen ook ziedpertoalen
¹¹ mit n pad ter langs. Ze zagen der krekt zo oet as ziedpertoalen op t noorden, net zo laank en net zo braid, mit zulfde oetgangen, inrichten en tougangen.
¹² Ziedpertoalen op t zuden haren ook zokse tougangen. Veur dij der in wol, laggen aal tougangen aan t begun van pad dat bie beschaarmmuur noar t oosten langs laip.

¹³ Man zee tegen mie: “Ziedpertoalen op t noorden en dij op t zuden, aan binnenhof, binnen haailege ziedpertoalen, want doar eten priesters dij bie de HEER kommen, alderhaailegste ovvers. Doar leggen ze alderhaailegste ovvers deel: waaitovvers, zuvernsovvers en schuldovvers, want dat stee is haaileg.
¹⁴ As priesters der in binnen, maggen ze nait van t haailegdom oet noar t boetenplaain goan. Eerst mouten ze klaaier doar ze dainst in doan hebben, dij haaileg binnen, in ziedpertoalen deelleggen. Ze mouten aander klaaier aandoun en den maggen ze noar stee van t gewone volk goan.”