2 Samuël Absalom tussen twij roadgevers (16:15-17:14)

2 Samuël 16

¹⁵ Ondertied wazzen Absalom en zien haile gezelschop van Isrelieten in Jeruzalem aankommen en Achitofel was ter ook bie.
¹⁶ Dou kwam Chusai, David zien vrund en roadsman, ook bie Absalom. “Leve de keunenk! Leve de keunenk!” raip e.
¹⁷ “Is dat nou kammeroadschop?” zee Absalom. “Woarom bist nait mit dien vrund mitgoan?”
¹⁸ “Nee hur,” zee Chusai, “dij de HEER en dit volk en ale Isrelieten kozen hebben, doar stoa ik achter, en doar blief ik achter stoan.
¹⁹ Doar komt nog bie: bie wèl kom ik in dainst? Toch zeker bie de zeun van mien heer. Net as ik in dainst was bie de voader, zo nou bie de zeun.”

²⁰ Dou zee Absalom tegen Achitofel: “Komaan, geef mie ais road. Hou pak we t aan?”
²¹ Achitofel zee: “Goa vot hèn en neem joen voaders bievraauwen dij hai achterloaten het om op t pelaais te pazen. As t haile volk vernemt dat ie t bie joen voader veurgoud verdurven hebben den zellen ze moud vatten en as ain man achter joe stoan.”
²² En zo wer der n tènt opzet veur Absalom op t dak van t pelaais en doar nam Absalom veur t oog van t haile volk bezit van zien voaders bievraauwen.

²³ In dij tied was n road van Achitofel net zoveul as n woord van God. Dat was zo bie David en ook bie Absalom. Zunder woord zunder wies deden ze wat hai zee.

⁰¹Achitofel zee tegen Absalom: “Loat mie twaalfdoezend man oetkaizen en doalek achter David aangoan, vannaacht nog.
⁰²Den overvaal ik hom as hai nog muid en ongedoan is. Ik joag hom schrik op hoed, en van aalteroatsie gaait aal zien volk der vandeur. Den blift e allain over en kin ik mit hom ofreken.
⁰³Ik zel zörgen dat aal t volk dat bie David is weer bie joe komt. En as ie dij aine, doar ie nou achter heer zitten, te pakken kriegen, wil dat zoveul zeggen as dat ie ale Isrelieten weer op joen haand kriegen en dat ter rust en vree komt.”
⁰⁴Dat leek Absalom en ale oldsten van Israël goud tou.
⁰⁵Toch zee Absalom: “Hoal ook nog ais Chusai d'Arkiet op, den kin wie heuren wat of dij der van zegt.”

⁰⁶Dou Chusai kwam, zee Absalom: “Zo en zo is t veurstel van Achitofel. Mout wie doun wat of hai zegt? As ie der aans over denken, kom der den mor mit veurndag.”
⁰⁷“Dizze raais het Achitofel t bie verkeerde èn,” zee Chusai.
⁰⁸“Ie waiten ja beter as wèl ook, dat joen voader en zien manlu veur gainain benaauwd binnen en grammiedeg as n beer dij ze zien jongen ofstolen hebben. Leuf mor nait dat zo'n ervoaren vechtersboas as hai vannaacht mit zien manlu ligt te sloapen.
⁰⁹Dou der denk om, hai holdt zok vervaast al schoel in n grot of aans woaraarns. As hai eerste is dij aanvaalt, den zel elkenain dij t heurt, zeggen: 'Absalom en zien volk hebben n dik pak sloag had!'
¹⁰ Alderdeegs n veurvechter mit t haart van n laiw zel den nog benaauwd worden. Hail Israël wait ja wel dat joen voader n held is as gain aander, en dat zien soldoaten dappere kerels binnen.
¹¹ Nee, ik geef joe te roade: hoal t haile Israël bie nkander, van Dan òf tot aan Berseba tou, zo talriek as zaand bie zee. En den mout ie zulm mit heur mitgoan.
¹² Woar dat hai ook touholdt, wie overvalen hom as daauw dij over t laand vaalt. Haizulm nait en ook gainain van zien manschoppen blift den nog in t levent.
¹³ En as hai zok terogtrekt in n stad, den loat wie hail Israël dikke koabels doarhèn mitnemen en slepen haile stad in leegte bie t wotter, aan leste stain tou.”
¹⁴ “Chusai zien plan is beter as dij van Achitofel,” zee Absalom, en aal Isrelieten zeden hom t noa. De HEER haar heur ja aanzet om t goie plan van Achitofel van toavel te vegen, omreden hai haar t op Absalom veurzain.