Wieshaid Wieshaid mout je in eren holden (6:1-21)

Wieshaid 06

⁰¹Luster doarom, keunenks, en heur aandachteg. Loat joe onderrichten, rechters over haile wereld.
⁰²Zet joen oren goud open, ie dij heersen over n haile bult en dij grootsk binnen op aal joen volken.
⁰³Ie hebben joen macht van de Heer kregen, joen heerschoppij komt van de Alderhoogste. Hai zel joen doun en loaten beoordailen en joen plannen noatrekken.
⁰⁴Ie binnen helpers van zien keunenkschop, mor ie binnen nait zuver in joen oordail, ie hebben wet nait holden en nait doan noar God zien wil.
⁰⁵Haard en vrezelk zel e doarom tegen joe optreden, want veur hoge heren is e ongenoadeg in zien oordail.
⁰⁶Minderman kin reken op genoa en vergeven, mor lu mit macht mouten n machteg oordail ondergoan.
⁰⁷De Aalmachtege bekommert zok nait om t aanzain dat ain het, hai schrikt nait terog veur hoge heren. Groot en luddek het hai zulm moakt en veur elkenain zörgt e gelieke goud,
⁰⁸mor dij staark is, staait n strenger onderzuik te wachten.
⁰⁹Doarom richt ik mien woorden aan joe, machthebbers, dat ie leren wat wieshaid is en nait ofdwoalen zellen.
¹⁰ Zai dij ales wat haaileg is sekuur in eren holden, zellen zulm haailegd worden, en zai dij dizze les ter haarten nemen, zellen ontzain worden.
¹¹ Dat zodounde wees begereg om mien woorden te heuren en ik zel joe onderricht geven.

¹² Wieshaid het n glaans dij der nooit ofgaait. Makkelk is ze te zain veur dij der van holdt, makkelk te vinden veur dij der noar op zöcht is.
¹³ Dij der noar verlangt, leert heur votdoalek kennen.
¹⁴ Dij veur heur vroug van bèr òf gaait om heur te zuiken, wordt nait muid: hai vindt heur stoef veur deur.
¹⁵ n Mensk kin zien verstand nait beter bruken as deur aan hom te denken. Dij om heur wakker ligt, zel gaauw vrij van zörg wezen.
¹⁶ Wieshaid is op zöcht noar lu dij heur weerd binnen, ze komt heur goudgunsteg in muit en verteunt zok bie elke gedachte.
¹⁷ Wieshaid begunt mit eerlieks verlangst noar onderricht,
¹⁸ wil om te leren, is van heur holden, van heur holden is doun noar heur wetten, doun noar heur wetten is woarbörg dat t nooit verbie gaait,
¹⁹ dat t nooit verbie gaait, brengt n mensk dicht bie God –
²⁰ verlangst noar wieshaid laaidt zodounde tou heerschoppij.
²¹ Hol doarom wieshaid in eren, machthebbers van wereld, as ie geern op troon zitten en mit scepter swaaien. Den regaaier ie veur aiweg en aaid.