Twijde braif aan Korintiërs Veur joen goave bedaank ie God (9: 6-15)

Twijde braif aan Korintiërs 09

⁰⁶Wait dit wel: zaait ain zuneg, zuneg zel ook zien opbrengst wezen; zaait ain rij, rij zel ook zien opbrengst wezen.
⁰⁷Loat elkenain geven wat t haart hom ingaf, nait mit n zoer gezicht en nait onder dwang. God holdt ja van n montere gever.
⁰⁸En hai is in stoat joe van ales rejoal tou te stoppen, dat ie t aaltied in elk opzicht roem en braid hebben en ook nog wat overholden veur alderhande goud waark.
⁰⁹Der staait ja: “Bie handenvol gaf e t vot aan aarme lu; nooit zel vergeten worden, houveul goud of e doan het.”
¹⁰ God levert zaaizoad aan wèl aan t zaaien gaait, en brood om te eten. Hai zel zörgen dat ie roem in joen zaaizoad zitten en dat wat ie mit gouddoun winnen, aal mor aanwast.
¹¹ Den wor ie van aal kanten zo riek dat ie rij oetdailen kinnen. En wat wie heur van joe deurgeven, brengt mensken der tou God te daanken.
¹² Dij hulp ja doar wie ons nou veur inzetten, vult nait bloots aan wat God zien volk te kòrt komt; dij brengt ook n stroom van daankbetugens aan God teweeg.
¹³ Ze stellen dizze hulp ja zo op pries: ze daanken God ter veur dat ie joe zo schikken noar t evengelie van Christus en dat ie heur en ale geleuvegen zo rejoal haand langen.
¹⁴ Boetendes beden ze God veur joe: zo geern zollen ze joe ais zain willen. God het joe ja zo boetengewoon goudgunsteg west.
¹⁵ Zo'n goave van hom, doar binnen ja gain woorden veur. Je maggen God ter wel stief veur bedaanken.