Deuteronomium Woarzeggerij en profetie (18: 9-22)

Deuteronomium 18

⁰⁹As ie in t laand kommen binnen dat de HEER, joen God, joe geft, den mag ie joe nait inloaten mit gruweldoaden van dij volken.
¹⁰ Der zel gainent bie joe wezen dij zien zeun of dochter deur t vuur goan let of aan woarzeggen dut, gain wolkenkieker, gainent dij zok bezeg holdt mit veurtaikens, gainent dij teuvert,
¹¹ gainent dij beswerens oetsprekt en gainent dij gaist van n dode of n woarzeggende gaist bevragt of road vragt aan doden.
¹² Want de HEER het n ofgries van elkenain dij zokse dingen dut. Vanwegens dizze ofgriezelke zoaken het de HEER, joen God, heur veur joe oetjagd.
¹³ Rechtschoapen zel ie wezen veur de HEER, joen God.
¹⁴ Want dij volken dij ie votjoagen zellen, heuren noar wiggeloars en woarzeggers, mor de HEER, joen God, het joe dat verboden.
¹⁵ De HEER, joen God, zel n profeet zo as ik, oet joen midden, oet joen bruiers, opstoan loaten. Ie zellen noar hom heuren.
¹⁶ Zo as ie van de HEER, joen God, vroagd hebben op dag van soamenkomst bie Horeb, dou ie zegd hebben: “Ik kin stem van de HEER, mien God, nait laanger aanheuren en dit grode vuur nait meer zain: k zol t ja bestaarven!”
¹⁷ Dou zee de HEER tegen mie: “Zai hebben geliek.
¹⁸ Ik zel n profeet, krekt as doe, oet t midden van heur bruiers opstoan loaten en hom mien woorden in mond leggen. Hai zel heur ales zeggen wat ik hom opdroag.
¹⁹ En zol der ain wezen dij nait noar mien woorden heurt dij hai sprekt in mien noam, hom zel ik rekenschop vroagen.
²⁰ Mor profeet dij t woagen duurt om n woord te spreken dat ik hom nait opdroagen heb, of te spreken oet noam van aander goden, dij profeet zel staarven.”
²¹ As ie bie joezulm zeggen zollen: “Hou kom we der achter of t gaait om n woord dat de HEER nait sproken het?”
²² nou, as t woord dat profeet sproken het in noam van de HEER nait oetkomt, den het t gain woord van de HEER west, mor den het t n woord van dij profeet zulm west en huif ie veur hom nait baang wezen.