Deuteronomium Omgang mit aander volken (7: 1-26)

Deuteronomium 07

⁰¹As de HEER, joen God, joe brocht het in t laand dat ie in bezit nemen zellen en hai verschaaiden volken veur joe verdreven het: Hethieten, Girgasieten, Amorieten, Kanaänieten, Perizzieten, Chiwwieten en Jebusieten – zeuven volken, machteger en staarker as ie –
⁰²en de HEER, joen God, heur aan joe overgeven het om heur te versloagen, den zel ie heur mit ban sloagen. Ie zellen gain verbond mit heur sloeten en ie zellen gain genoade mit heur hebben.
⁰³Ie zellen nait mit heur traauwen: zellen joen dochters nait aan heur zeuns geven en heur dochters zel ie nait nemen veur joen zeuns.
⁰⁴Want zai zellen joen zeuns van mie ofvaleg moaken en aander goden dainen loaten. Den zel kwoadhaid van de HEER tegen joe lösbranden en joe in de kòrtste keren oetreuden.
⁰⁵Zo mout ie mit heur aan: heur altoaren omsmieten, heur haailege stainen kepothaauwen en heur ofgodsbeelden opbranden.
⁰⁶n Haaileg volk bin ie ja veur de HEER, joen God. De HEER, joen God, het joe oetkozen om oet ale volken van eerde zien aigen volk te wezen.
⁰⁷De HEER het zok nait mit joe verbonden en joe kozen omdat ie machteger binnen as ale volken – ie binnen alderdeegs onbedudenste onder ale volken.
⁰⁸Mor omdat de HEER joe laifhad het en zok holden het aan aid dij hai aan joen voaders sworen het, het de HEER joe mit staarke haand oetlaaid en joe verlöst oet t sloavenhoes, oet macht van farao, keunenk van Egypte.
⁰⁹Ie waiten: allenneg de HEER, joen God is God, de woarachtege God dij zok holdt aan zien verbond en zien traauw aan heur dij hom laifhebben en dij zok aan zien geboden holden tot in t doezendste geslacht.
¹⁰ Mor dij hom hoat, doar rekent hai mit òf en reudt hai oet. Hai zel nait ofzain van zien vroak tegen heur dij hom hoaten. Hai vreekt zok op slag op elkenain dij hom hoat deur hom oet te reuden. Hai geft gain oetstel aan dij hom hoat.
¹¹ Hol joe aan t gebod en aan veurschriften en regels dij ik joe vandoag opdroag om joe aan te holden.

¹² As ie noar dizze veurschriften heuren en joe der goud aan holden, zel de HEER, joen God, zien verbond en zien goudgunsteghaid dij hai aan joen voaders sworen het, woarmoaken.
¹³ Hai zel joe laifhebben, zien zegen geven en joe talriek moaken. Hai zel vrucht van joen schoot zien zegen geven en vrucht van joen akker, joen koorn, joen wien en eulie, t kaalven van joen koien en dracht van joen schoapen en bokken in t laand, doar hai joen voaders van sworen het dat hai t aan joe geven zol.
¹⁴ Ie zellen meer zegend wezen as ale volken. Van joen manlu, vraauwlu of van joen vij zel der gainain onvruchtboar wezen.
¹⁵ De HEER zel joe vrijwoaren van ale zaiktes, male kwoalen van Egypte doar ie wait van hebben, zel hai joe nait kriegen loaten, mor geven aan elk dij joe hoat.
¹⁶ Ie zellen ale volken dij de HEER aan joe oetlevert, vernailen. Ie zellen gain genoade mit heur hebben en heur goden nait dainen. Dat zol n vaalstrik veur joe worden.

¹⁷ Zol ie bie joezulm zeggen: Dizze volken binnen machteger as ik, hou zol ik heur oet heur laand verdrieven kinnen?
¹⁸ Wees den nait benaauwd veur heur, mor bedenk wat de HEER, joen God, mit farao en hail Egypte doan het,
¹⁹ grode bezuikens dij ie mit aigen ogen zain hebben, wonders en taikens, staarke haand en oetstoken aarm doar de HEER joe mit oetlaaid het. Zo zel de HEER, joen God, doun mit ale volken doar ie baang veur binnen.
²⁰ Boetendes zel de HEER grode wepen op heur ofsturen, net zo laank tot lesten van heur dij overbleven wazzen en veur joe beziedkropen, om haals kommen.
²¹ Wees nait benaauwd veur heur want de HEER, joen God, is bie joe: n grode God, om baang veur te worden.
²² De HEER, joen God, zel dij volken ain noa aander veur joe oetdrieven. Ie zellen heur nait in ain keer verdrieven kinnen want wilde daaiern zollen joe te maans worden.
²³ De HEER, joen God, zel heur aan joe overgeven. Hai zel n geweldege schrik over heur kommen loaten, tot zai oetreud binnen.
²⁴ Heur keunenks zel hai in joen macht geven zodat ie heur noamen onder hemel oetreuden kinnen. Gainain zel t tegen joe holden kinnen, tot ie heur oetreud hebben.
²⁵ Ie zellen heur ofgodsbeelden opbranden. Wees nait begereg noar t gold en t zulver dat ter aan zit, aigen joe dat nait tou. t Zol joe in de macht kriegen kinnen en dat is ja n ofgries veur de HEER, joen God.
²⁶ Ie zellen gain ofgries in joen hoes brengen, want den zol ie zulm onder ban kommen. Ie zellen der n haartgrondege ofkeer van hebben, joa t zel joe n ofgries wezen, omreden t ligt ja onder ban.