1 Samuël Saul verlöst Jabes en wordt as keunenk aansteld (11: 1-15)

1 Samuël 11

⁰¹Nachas van Ammon trok op en hai belegerde Jabes in Gilead. “Sloet n verbond mit ons,” zeden manlu van Jabes tegen hom, “den zel we joe dainstboar wezen.”
⁰²“Dat is goud,” zee Nachas oet Ammon tegen heur. “Mor op veurwoarde dat ik elk van joe t rechteroog oetsteek. Dizze schaande breng ik over hail Israël.”
⁰³“Geef ons zeuven doag tied. Den zel we bodes sturen deur t haile laand van Israël,” zeden oldsten van Jabes. “En as ter gainain komt om ons te helpen, zel wie ons aan joe overgeven.”
⁰⁴In Gibea doar Saul woonde, deden bodes heur verhoal aan t volk van stad. Elkenain begunde haard te reren.
⁰⁵Dou kwam Saul mit baisten van t laand òf. “Woarom reert dat volk zo?” vruig e. Ze vertelden hom wat dij manlu oet Jabes zegd haren.
⁰⁶Dou Saul dizze woorden heurde kwam gaist van God over hom en hai wer haildaal vergrèld.
⁰⁷Hai nam n span baisten, haauwde ze in stokken en stuurde dij mit bodes deur t haile laand van Israël en zee, dat mit baisten van elk dij nait achter Saul en Samuël oettrok, t zulfde doan worden zol. Schrik veur de HEER kwam dou over t haile volk en ze trokken oet as ain man.
⁰⁸Saul luit heur aantreden in Bezek. Der wazzen drijhonderddoezend oet Israël en dattegdoezend oet Juda.
⁰⁹Tegen bodes dij kommen wazzen, zee men: “Dit mout ie zeggen tegen manlu van Jabes in Gilead: 'Mörgen veur mirreg zel der veur joe verlözzen kommen.'” Dou bodes dat aan manlu van Jabes overbrochten, wazzen ze deurhèn blied.
¹⁰ Tegen Nachas zeden ze: “Mörgen zel wie ons aan joe overgeven. Den kin ie mit ons doun wat of joe goud tou liekt.”
¹¹ Aanderdoagsmörgens verdailde Saul t volk in drij ofdailens en dij drongen smörgensvroug deur tot midden in t legerkaamp en versluigen Ammonieten veur t haitste van dag. Dij overbleven. werden oet mekoar jagd, zodat ter van heur gain twij bie nkander bleven.

¹² Noa ofloop zee t volk tegen Samuël: “Wèl het ter zegd: 'Mout dij Saul keunenk over ons wezen?' Hier mit dij kerels! Den zel we heur doodmoaken!”
¹³ Mor Saul zee: “Op dizze dag zel gainain doodmoakt worden, want de HEER het Israël vandoag verlözzen brocht.”

¹⁴ Samuël zee tegen t volk: “Kom, loat wie noar Gilgal goan, den zel we doar t keunenkschop vannijs instellen.”
¹⁵ t Haile volk ging dou noar Gilgal tou en muik Saul doar keunenk veur God in Gilgal. Ze slachtten doar veur God vree-ovvers. Saul en ale Isrelieten wazzen deurhèn blied.