Wieshaid van Jezus Sirach Wieshaid n zegen (14:20-15:10)

Wieshaid van Jezus Sirach 14

²⁰ Gelokkeg is mensk dij zok verdaipt in wieshaid,
dij der op oet is inzicht te kriegen,

²¹ dij wegen van wieshaid noagaait,
heur gehaaimen perbaaiert gewoar te worden.

²² Loat hai t spoor van wieshaid volgen,
bie heur poorten noar heur speuren.

²³ Hai kikt bie heur deur vènsters,
lustert aan heur deuren.

²⁴ Hai vestegt zok bie heur hoes,
slagt zien tèntpèn in heur muren.

²⁵ Hai zet zien tènt stoef bie heur hèn,
hai vestegt zok op n goud stee,

²⁶ hai zet zien kinder onder heur beschut,
en woont onder heur toeken.

²⁷ Zai beschaarmt hom tegen hetten,
in heur glorie woont e.

⁰¹Zo dut ain dij ontzag het veur de Heer,
dij in wet onderlegd is, zel wieshaid kriegen.

⁰²Zai komt hom in muit as n moeke,
as n vraauw dij nog moagd is, zo wacht zai hom op.

⁰³Zai geft hom t brood van inzicht te eten,
t wotter van wieshaid let ze hom drinken.

⁰⁴Hai het steun aan heur en wankelt nait,
hai verlet zok op heur en komt nait mit sneue neus te stoan.

⁰⁵Zai zet hom hoger as mensken om hom tou,
maank t verzoamelde volk let zai hom spreken.

⁰⁶Bliedschop en feestkraans worden hom geven,
hai krigt n noam dij nooit vergaait.

⁰⁷Onverstandege lu kriegen gain wieshaid,
zundoars leren heur nait kennen.

⁰⁸Wieshaid staait wied bie grootseghaid vandoan,
leugenputen denken nait aan heur.

⁰⁹Lofzang oet mond van zundoar is misploatst,
zai is nait ingeven deur de Heer.

¹⁰ n Lofzang mout mit wieshaid oetsproken worden,
den geft de Heer zien zegen der aan.