Deuteronomium Over eerstelingen (26: 1-11)

Deuteronomium 26

⁰¹As ie in t laand kommen dat de HEER, joen God, joe as aarfdail geft en ie t in bezit nomen hebben en der in wonen,
⁰²den mout ie van ale vruchten dij ie van t laand dat de HEER, joen God, joe geft, eerste vrucht nemen, in n körf doun en noar t stee brengen dij de HEER, joen God, verkaizen zel om doar zien noam wonen te loaten.
⁰³As ie bie priester kommen dij den dainst het, den mout ie tegen hom zeggen: “Vandoag verkloar ik veur de HEER, joen God, dat ik kommen bin in t laand doar de HEER van onder aid aan ons veurolders beloofd het om t aan ons te geven.”
⁰⁴Priester nemt körf den van joe aan en zet dij veur t altoar van de HEER, joen God.
⁰⁵Den mout ie veur de HEER, joen God, plechteg verkloaren: “Mien voader was n Arameeër. Hai swon om en trok mit n luddek koppeltje volk noar Egypte en huil doar tou as vremde. Hai wer doar tou n groot volk, staark en machteg.
⁰⁶Egyptenoars hebben ons min behandeld, zai huilen ons onder knoet en luiten ons sloavenwaark doun.
⁰⁷Dou heb wie de HEER aanroupen, God van ons veurolden. De HEER heurde ons aan en zag ons ellèn, ons knooien en ons verdrokt worden.
⁰⁸De HEER het ons tou Egypte oet hoald mit staarke haand en oetstoken aarm, mit grode verschrikkens, taikens en wonders.
⁰⁹Hai het ons noar dit stee brocht en ons dit laand geven, laand dat overlopt van melk en hunneg.
¹⁰ Dat hier breng ik eerste vruchten van grond dij ie, o HEER, mie geven hebben.” Ie mouten ze deelzetten veur de HEER, joen God, en joe deelboegen veur de HEER, joen God.
¹¹ Wees den blied om aal t goie dat de HEER, joen God, aan joe en joen hoes geven het: ie, en Leviet en vremde dij in joen hoes touholdt.