Numeri Wijden van Levieten (8:5-26 )

Numeri 08

⁰⁵De HEER zee tegen Mozes:
⁰⁶“Neem Levieten apaart van aandere Isrelieten en moak heur raain.
⁰⁷Most zo mit heur te waark goan om heur raain te moaken: besprenkel heur mit wotter dat vrijmoakt is van zunde, noadat ze n scheermès over t haile liggoam hèn hoald hebben en heur goud wosken hebben. Den binnen ze raain.
⁰⁸Zai mouten den n bol, n jonkbaist, kriegen mit n meelovver van waaitenbloum aanmengd mit olieveneulie, en most zulm nog n bol, ook n jonkbaist, as zundeovver kriegen.
⁰⁹Den most Levieten veur soamenkomsttènt kommen loaten en most haile gemainschop van Isrelieten verzoameln.
¹⁰ Most Levieten veur t aangezicht van de HEER brengen en Isrelieten mouten Levieten haand opleggen.
¹¹ Aäron mout heur noamens Isrelieten aan de HEER aanbaiden as wijovver; den binnen zai der om dainst van de HEER te doun.
¹² Levieten mouten haand op kop van jonge bollen leggen en doe brengst ain as zunde-ovver en aander as brandovver aan de HEER om t veur Levieten goud te moaken.
¹³ Zet Levieten veur Aäron en zien zeuns hèn en droag heur as wijovver op aan de HEER.
¹⁴ Zo most Levieten ofzundern van aandere Isrelieten; den heuren Levieten mie tou.
¹⁵ Astoe heur raain moakt hest en heur opdroagen hest, treden Levieten doarnoa aan om heur waark bie soamenkomsttènt te doun.
¹⁶ Want ze binnen geven, ze werden onder Isrelieten aan mie ofstoan. In stee van alen dij as eerste mouderschoot verloaten, eerstgeborenen van ale Isrelieten, heb ik heur kregen.
¹⁷ Want ale eerstgeborenen onder Isrelieten, zowel van mensken as van vij, binnen mienent: op dag dat ik eerstgeborenen van Egypte doodmuik, heb ik heur haailegd.
¹⁸ Ik heb Levieten kregen in stee van ale eerstgeborenen in Israël.
¹⁹ Ik heb Levieten aan Aäron en zien zeuns doan om veur Isrelieten dainst te doun bie soamenkomsttènt en om t veur Isrelieten weer goud te moaken, zodat ter gain staarfte komt onder Isrelieten as ze te dichtbie t haailegdom kommen.”

²⁰ Hierop muiken Mozes en haile gemainschop van Isrelieten Levieten dainstboar. Noar ales wat de HEER aangoande Levieten besteld haar, deden Isrelieten mit heur.
²¹ Levieten muiken zok vrij van zunde en wosken heur goud; Aäron brochde heur as wijovver veur t aangezicht van de HEER en hai muik t veur heur weer goud. Zo muik e heur raain.
²² Noatied kwammen Levieten om heur dainst te doun bie soamenkomsttènt onder touzicht van Aäron en zien zeuns. Ze deden t zo as de HEER Mozes besteld haar wat Levieten aangaait.

²³ De HEER zee tegen Mozes:
²⁴ “Dit is wat veur Levieten geldt: wèl vieventwinneg joar of older is, treedt in dainst om zien waark bie soamenkomsttènt te doun.
²⁵ Van fiefteg joar òf aan mout e opholden mit t waark en gain dainst meer doun.
²⁶ Den kin e zien femilie nog wat helpen bie soamenkomsttènt bie toak dij ze verrichten, mor dainst zulm dut e nait meer. Zo most regeln wat Levieten doun mouten.”