Wieshaid van Jezus Sirach Loflaid op veurolden (44:1-15)

Wieshaid van Jezus Sirach 44

⁰¹Loat ons vernuimde manlu priezen,
ons veurolden, geslacht noa geslacht.

⁰²De Heer het heur n bult glorie toupaart,
heur van t begun òf aan groot moakt.

⁰³Der wazzen heersers over keunenkrieken,
manlu vernuimd om heur kracht,

roadslu vol inzicht,

verkundegers van wat profeten zeggen,

⁰⁴laaiders van t volk deur heur road
en deur heur verstandeg onderricht van t volk –

klouk wazzen heur woorden bie heur onderwies.

⁰⁵Der wazzen lu dij meziekwiezen bedochten,
en mensken dij spreuken vastlegden,

⁰⁶riek volk mit zeggenschop,
vredestichters in heur aigen lougen.

⁰⁷Aalmoal werden ze prezen deur lu dij dou leefden,
ze wazzen tröts van heur tied.

⁰⁸Gounent van heur luiten n noam noa,
zodat heur lof nog aaltied verkundegd wordt.

⁰⁹Aan aandern wordt nait meer docht,
ze binnen verswonnen of haren ze nooit bestoan,

of wazzen ze nooit geboren;

en net zo verging t heur kinder.

¹⁰ Mor eersten wazzen barmhaarteg,
heur rechtveerdeghaid wer nait vergeten.

¹¹ Heur noam blift heur noageslacht bie,
heur noazoaten binnen heur goie aarvenis.

¹² Heur noageslacht holdt zok aan t verbond,
heur noazoaten hebben dat aan heur te daanken.

¹³ Heur noageslacht blift aaid bestoan,
heur goie noam zel nait oetwiskt worden.

¹⁴ Ze worden in vree begroaven,
heur noam leeft deur van geslacht op geslacht.

¹⁵ Van heur wieshaid zellen volken vertellen,
gemainschop zel heur lof verkundegen.