Genesis Bruiers van Jozef veur eerste moal noar Egypte (42: 1-24)

Genesis 42

⁰¹Jakob heurde dat ter in Egypte koorn was en hai zee tegen zien zeuns: “Wat stoa ie nkander aan te kieken?
⁰²Ik heb heurd, dat ter in Egypte koorn te kriegen is. Goa der hèn en koop dat doar veur ons, dat wie in leven blieven en nait staarven.”
⁰³Tien bruiers van Jozef raaisden òf om in Egypte koorn te kopen.
⁰⁴Mor Jozefs volle bruier Benjamin, dij luit Jakob nait mit zien bruiers mitgoan. Der zol hom ais wat overkommen.

⁰⁵Maank lu dij kwammen om koorn te kopen, wazzen zeuns van Israël ook, want der was honger in t laand Kanaän.
⁰⁶Jozef bestuurde t laand. Hai verkochde koorn aan t haile volk van t laand. Bruiers van Jozef kwammen ook bie hom. Zai bogen daip veur hom deel.
⁰⁷Jozef zag zien bruiers en herkende heur, mor dee net of was hai n vremde veur heur. Hai sprak heur vraid aan: “Woar kom ie weg?” Zai zeden: “Van Kanaän, om eten te kopen.”
⁰⁸Jozef zag dat zien bruiers t wazzen, mor zai zagen nait dat hai t was.
⁰⁹Jozef dochde aan dreumen dij hai over heur had haar. Hai zee tegen heur: “Ie binnen spionnen, ie binnen hier om oet te vigelaaiern woar of t laand n zwak stee het.”
¹⁰ “Nee heer,” zeden ze, ” joen knechten binnen kommen om broodkoorn te kopen.
¹¹ Wie binnen aalmoal zeuns van ain man, wie binnen rechtschoapen. Joen knechten binnen hier nait om te spioneren.”
¹² Hai zee: “Nee, ie binnen om oet te vigelaaiern woar t laand n zwak stee het.”
¹³ Ze zeden nog n moal: “Wie, joen dainstknechten, wazzen mit zien twaalven, twaalf bruiers, zeuns van ain man in Kanaän. Lutjeste is bie ons voader en ain is der nait meer.”
¹⁴ Jozef zee: “t Is zo as ik t zeg: ie binnen spionnen.
¹⁵ En zo zel woarhaid aan t licht kommen. Zo woar as farao leeft: ie binnen spionnen.
¹⁶ Ie sturen ain van joe hèn om joen bruier te hoalen en aandern worden hier vastholden. Zo zel blieken of joen woorden woar binnen. En zo nait, joa, zo woar as farao leeft, den bin ie spionnen.”
¹⁷ Hai zette heur drij doagen bie nkander in t gevang.

¹⁸ Op daarde dag zee Jozef tegen heur: “As ie doun wat ik joe zeggen zel, zel ie in leven blieven, want ik heb ontzag veur God.
¹⁹ As ie eerlek binnen, blift ain van joen bruiers vastzitten in t gevang en ie goan te waark en brengen t broodkoorn dat ie kocht hebben noar hoes, doar honger is.
²⁰ Joen jongste bruier breng ie hier. Den zel blieken of ie woarhaid sproken hebben en zel ie nait staarven.” Dat deden ze.
²¹ Zai zeden tegen nkander: “Wis en woarachteg, wie hebben ons bezundegd aan ons bruier. Wie zagen hou benaauwd of hai was dou hai ons om genoade smeekte, mor wie wollen t nait heuren. Doarom zit wie nou mit dizze ellèn.”
²² Ruben zee: “Ik zee t al: bezundeg joe nait aan dij jong. Ie wollen t nait heuren en doarom wordt zien bloud opaaist.”
²³ Zai wozzen nait dat Jozef heur verstoan kon, want wat zai zeden wer deur n tolk vertoald.
²⁴ Hai draaide zok om en schraifde. Dou hai weer bie heur kwam, pruit hai mit heur; hai greep Simeon en luit hom veur heur ogen binden.