Ezechiël Ezechiël en aander profeten (12:21-14:11)

Ezechiël 12

²¹ Ik kreeg dit woord van de HEER:
²² “Manmensk, wat is dat ook nog mor veur taimke bie joe in Israël: 'Doagen verstrieken en viziounen vergoan'?
²³ Goud! Zeg doarom mor tegen heur: 'Dit zegt God, de HEER: Ik zel zörgen dat ter n èn komt aan dit taimke, men zel t in Israël nait meer heuren. Nee, doagen binnen stoef bie dat elk vizioun woar wordt.
²⁴ Den zel der in hail Israël gain mislaaidend vizioun meer zain worden of vaalze veurspellens heurd.
²⁵ Ik heb mie t haile goud veurnomen! Wat ik, de HEER, zeg, zel gebeuren, t zel nait oetsteld worden. Wat ik zeg, zel ik nog tiedens joen levent doun, rebels volk! – dat zegt God, de HEER.'”

²⁶ Ik kreeg dit woord van de HEER:
²⁷ “Doe waist, manmensk, wat t volk van Israël zegt: 'Viziounen van hom sloagen op vèrre toukomst. Hai profetaaiert over tieden dij nog wied vot binnen.'
²⁸ Goud! Zeg doarom mor tegen heur: 'Dit zegt God, de HEER: Wat ik mie veurnomen heb, zel nait laanger oetsteld worden. Ales wat ik zeg, zel gebeuren – dat zegt God, de HEER.'”

⁰¹Ik kreeg dit woord van de HEER:
⁰²“Manmensk, kloag aal profeten van Israël aan dij nog profetaaiern duren. Zeg tegen dij profeten dij heur aigen bosschop verkundegen: 'Luster noar de HEER zien woorden!
⁰³Dit zegt God, de HEER: O wai, dij verdwoasde profeten dij zok allenneg mor verbeelden dat ze wat zain hebben.
⁰⁴Jakhaalzen dij tussen puunbulten touholden, dat binnen dien profeten, Israël!
⁰⁵Ze binnen nait op bres stoan goan veur heur volk en hebben der gain muur om optrokken, dat ze nait wieken zollen in stried op de HEER zien dag.
⁰⁶Wat ze zain is bedraigerij, heur veurspellens binnen leugenachteg. Ze beweren: 'Dit zegt de HEER …', mor de HEER het ze nait stuurd. En den verwachten ze ook nog dat heur woorden oetkommen!

^7-8 Is t zo nait – zegt God, de HEER – dat joen viziounen bedrog binnen en joen veurspellens leugenachteg? Ie zeggen ja: 'Zo zegt de HEER …', aalhouwel ik niks zegd heb. Omdat wat ie zeden bedrog was en joen viziounen leugenachteg, doarom zel ik joe kriegen – zegt God, de HEER.

⁰⁹Ik keer mie tegen dij profeten mit heur list en bedrog en heur leugenachtege veurspellens. Ze zellen tou gemainschop oetstöt worden. Ze zellen nait meer schreven stoan in bouken van t volk van Israël en in mien volk heur laand zel der gain stee meer veur heur wezen. Den zel ie inzain dat ik God, de HEER, bin.
¹⁰ Profeten hebben mien volk op biesterboan brocht dou ze zeden: 't Blift vree veur aaid!' Mien volk baauwde muren dij deur profeten mit witkaalk bestreken werden. En vree bleef t nait!
¹¹ Zeg doarom tegen dij striekers: 'Paas op, muur zel instörten!' As slagregens deelkommen, hoagelstainen noar beneden kleddern, as störm lösbrekt
¹² en muren instörten, zel der den nait zegd worden: 'Woar is kaalkloag bleven dij ie der over streken hebben?'
¹³ Doarom – zegt God, de HEER – zel ik in mien gram n störm lösbreken loaten en slagregens deelspoulen doun, ik zel hoagelstainen noar beneden kleddern loaten in mien kwoadens dij t aal verrinnewaaiert.
¹⁴ Ik hoal dij witplaaisterde muren omdeel, ze zellen instörten en heur fonnementen zellen bloot te liggen kommen. Stad zel in puun valen en ie zellen omkommen. Ie zellen waiten dat ik de HEER bin.
¹⁵ Ik zel mien gram stillen op muur en op dij hom mit witkaalk bestreken hebben. Ik zeg joe dat dij muren verdwienen zellen en dij heur bestreken hebben, der bie:
¹⁶ Israël zien profeten mit heur profetaaiern, dij viziounen haren van vree, aalhouwel t haildaal gain vree blieven zol – dat zegt God, de HEER.

¹⁷ Manmensk, richt die nou op vraauwlu van dien volk dij heur aigen bosschop verkundegen, en kloag heur aan.
¹⁸ Zeg: 'Dit zegt God, de HEER: O wai, vraauwlu dij banden naaien veur aal polzen en handen, dij sluiers moaken dij pazen om kop van groot en klaain, om zo zielen van mensken te vangen! Wil ie mien volk in joen netten vangen en joen aigen levent ter ofredden?
¹⁹ Ie hebben mien volk van mie vervremd veur n haandvol gaarst en n poar hompen stoet. Ie loaten mensken staarven dij nait staarven mouten, en holden mensken in leven dij nait in leven blieven maggen. Ie hebben mien volk veurlogen en t het lustert noar joen leugens.
²⁰ Doarom – zegt God, de HEER – verrop ik banden doar ie mensken mit vangen as vogels. Ik rop ze joe van aarms òf en loat mensken vrij dij in joen strupen vongen binnen.
²¹ Ik verrop joen sluiers, ik red mien volk oet joen macht. Ie zellen gain greep meer op heur hebben: ie zellen waiten dat ik de HEER bin.
²² Ie hizzen mit joen leugens onschuldege mensken schrik aan, aalhouwel ik gain kwoad tegen heur in t zin heb. Ie pittjen schuldege mensken aan dat ze zok nait van heur kwoaie weg ofkeren en in leven blieven.
²³ Doarom is t oflopen mit joen bedraigelke viziounen en zel ie gain veurspellens meer doun. Ik zel mien volk oet joen macht redden en den zel ie waiten dat ik de HEER bin.'”

⁰¹Op n dag kwammen n poar oldsten van Israël bie mie en dou ze tegen mie over zitten gingen,
⁰²kreeg ik dit woord van de HEER:
⁰³“Manmensk, dizze manlu hebben heur drekgoden hoog en hebben niks aans veur ogen as zunde, doar ze over strovveln. Zol ik mie doarom deur zokse lu nog bevroagen loaten?
⁰⁴Zeg tegen heur: 'Dit zegt God, de HEER: Ieder Isreliet dij zien drekgoden hoog het en niks aans wil as zunde dij hom strovveln let en dij toch noar n profeet lopen duurt, zel ik t antwoord doun dat e mit zien drekgoderij verdaint.
⁰⁵Ik zel t volk van Israël vuilen loaten dat t zok mit aal zien drekgoderij van mie ofkeerd het.'
⁰⁶Zeg doarom tegen t volk van Israël: 'Dit zegt God, de HEER: Kom weerom bie mie. Keer joen drekgoden rug tou en hol op mit joen gruweldoaden!
⁰⁷Elkenain, aal Isrelieten en aal vremden dij in Israël verkeren net zo goud, elkenain dij zok van mie ofkeerd het en elk dij zien drekgoden hoog het en deurgaait mit zunde dij hom strovveln let en den toch noar profeet lopt om mie te bevroagen, dij zel ik, de HEER, votdoalek zulm van antwoord dainen.
⁰⁸Ik zel mie tegen hom keren en n ofschrikwekkend veurbeeld van hom moaken, ik zel hom oet mien volk votdoun en ie zellen besevven dat ik de HEER bin.
⁰⁹As n profeet zok verlaaiden let n antwoord te doun, zel dat wezen omdat ik, de HEER, hom doar tou verlaaid heb. Ik zel hom stravven en verrinnewaaiern. Hai zel nait meer bie mien volk Israël heuren.
¹⁰ Profeet is krekt zo schuldeg as dij hom vragt. Baaident zellen heur straf nait ontlopen.
¹¹ Den zel t volk van Israël zok nait meer van mie ofkeren en ze zellen nait meer onraain worden deur aal heur wandoaden. Den zellen zai mien volk wezen en ik heur God – dat zegt God, de HEER.”